Zeedel

Als Junge bii-n-y hit nur trendy
mit eme Multi-Media-Händy,
dasch e Gräät, wo mee als numme
zem Schwätze bruucht wird vo de Dumme:
Das Dail isch au zem Muusig loose
(modäärner als e Spiilzygdoose),
es isch als Fottiapperaat
fir Schnappschiss allewyyl baraat,
und es basse kuurzi Filmli
uff das glaine Faarb-Bildschiirmli,
mechtsch Di mool e bitz verwiile
kasch e kuurzes Spiili spiile,
not least, but last – isch das nit scheen
git s au ganz tolli Klingeldeen!

S Grät elai – es duet mer laid
macht ooni Inhalt nit vyl Fraid,
was nutzt die beschti Hardware aim,
ooni Software blyt s dehaim.
Doch d Tele-Meedie-Induschdryy
hilft mir sicher gärn derbyy
fir dä dyyri Plaudergnoche
e wiirzig Software-Sippli z koche.

Wenn s lyttet, gheert me, s isch famoos,
was ych fir Lieblingsmuusig loos,
e soo-n-e Klingeldoon – he nai!
koscht jo numm drey-vier Stai,
und wenn s e-n-ander Lied soll syy
zaal y aifach noomool yy.
Bim iTunes koschtet s, s macht mi mied,
dr halbi Bryys fir s glyyche Lied,
und deent denn eerscht no au vyl nätter
ooni Polyphoon-Getschätter.

Fäält s DS ooder d PSP
kaasch mi drotzdäm spiile gsee,
y haa-n-e Game vom Onlinelaade
fir weenig Stutz schnäll aabeglaade,
dr Bryys syg ginschtig, muess y hoffe:
ab acht Stai (nach oobe-n-offe).
Noo kuurzer Zyt haa-n-y s denn gsee
Auge-n-und Dyyme diemmer wee.

Zem de-n-andere z imponiere
kaa-me-n-au no daas brobiere:
E Radar wär doch wunderbar,
doch d Sicht wird doomit au nit glar.
"Veraa.....sch Dyn Leerer" syyg e Hit,
bi schlächte Noote hilft das nit.
E Schmyynee und Aquaarium
sinn eppe glyych wie Vaalium.
Au Megavibra und Rasierer
sinn raini Gäld-Ussgää-Verfierer.

Alldaag kunnt Wäärbig fir so Sache,
wo me soll uff s Natel mache:
"Schigg SMS, meegligscht glyy,
denn bisch au Du cool und derbyy!"
Fasch deyflisch wird me soo verfiert,
e SMS, scho isch s bassiert,
wiider e baar Stutz verbroote ...
Wo bii-n-y doo nuur aanegroote?

Daagyy, daaguss haa-n-ych esoo
my Sagg-Gäld sinnlos duuregloo,
haa uff d Keschte gaar nimm gachtet
und gnaadelos my Spaarsau gschlachtet.
Doch aismools wird my Häärz ganz schwäär,
wil dr Bildschiirm, dää blybt läär,
mit Schregge gsee-n-y nämmlig deert:
"Dieser Dienst wurde gesperrt!"
My Gäld, so tschegg y jetz scheniert,
hätt ych doch gscheyter inveschtiert,
fir Ramsch haa-n-y s nur duuregloo
und gaar nyt Blyybends ghaa drvoo
(wenn s Gotti wusst, wohii sy Batze
goot, vor Eerger wuurd s grad blatze).
In Schulde duen-ych jetz versuffe,
d Spaarsau isch e Schäärbehuffe,
haa kai Rappe mee im Sagg,
das alles wäg däm Gauner-Pagg.

Y kaa s drumm langsam nimmi gheere,
wie die uns Jungi wänn beteere,
denne-n-unser Sagg-Gäld pagge
und in aige Sagg yysagge.

Es sin emol zwai Dante gsi,
die aint, d Fra Fasnacht, isch drbyy,
die ander, d Coucousyyne Holle
– me het scho gmaint, si syg verscholle –
die het doch soo gärn Fasnachtskiechli
und kunnt schpontaan drum uff e Bsiechli.

(Ding-Dong) "Aadie Fasnächtli, ainewääg
y kumm ze Dir fir zwai, drey Dääg."
"Jee, Hölleli", sait d Fasnacht scheniert,
"Hesch Di ächtsch im Daag drumbiert?
Glyy wird doch d Fasnacht zelebriert
drum bi-n-y laider oggubiert!"
"Ach, Fasnächtli, me mainti fascht,
ych – als Gascht – fall Dir zer Lascht.
Muesch kai Angscht haa, gar d Blaanscheryy
fir my Bett ha-n-ych drbyy,
a mym Bsuech due-n-ych nimm rittle,
und zeerscht grad mol my Divee schittle."

"Jesses, Hölleli, ojeemynee,
s wird jo alles ganz voll Schnee!
Fir my Fescht, do gsee-n-ych root",
schreyt d Fra Fasnacht in dr Noot.
Doo sait d Fra Holle: "S duet mer laid,
y ha doch gmaint, so Schnee miech Fraid,
jetz mach doch dääwääg kai Gezeeter,
s isch numme joo-n-e halbe Meeter."
"Was haisst do NUMME? Kataschtrooffe!
Me sott Di fir dä Fräävel schtrooffe!"
duet sich d Fra Fasnacht enerviere
und mit me Gläbber revanschiere.

So sin die zwai in d Hoor sich groote
und denne – jetz derfsch drey mol roote –
e kuurze Bligg vom Himmel aabe,
scho wird dr Wyyber-Zangg begraabe,
fasziniert gänn baidi Rueh
und luege-n-em Wunder vo Basel zue:

Noo de-n-eerschte Schregg-Seggunde
hän d Bebbi d Rueh glyy wiider gfunde.
E jeede schuuflet und paggt aa
as d Fasnacht grettet wärde kaa.
D Schtroossebutzer sin vo Nutze,
dien die ganz Nacht Schtroosse butze.
S Comité schteggt schoo-n-efange
fir dr Cortège Slaalomschtange.
D Sanidäät hoolt sich no gschwind
im Wallis drey Lawyynehind.
E jeede Käller richtet sich yy
uff dr Cortège-Après-Schyy.
Am Suntig zoobe dien schtatt pfyffe
d Pfyffer zue de Schuufle gryffe.
D Ladäärne kunnt denn au scho glyy
schtatt uff Redli halt uff Schyy.
Es macht dr Zug-Chef alle Muet:
"Schpaalebärg – Pulver, guet!"
D Drummler dien – es isch kai Schaade –
fir aimol Salz schtatt Schtai ablaade.
Em Voordraab duet s scho langsam gniegele
wil immer är e Schpuur muess pfliegele.
Und dr Major schiggt im Getimmel
schnäll e Schtoossgebätt zem Himmel.

Esoo haisst s denn – nit sälbverschtändlig –
am vieri am Määntig Moorge-n-ändlig
drotz nasse Fiess und kaltem A......
"Moorgeschtraich, Vorwärts, Marsch!"

Doo sait d Fra Holle – scho fascht grummlig:
"Du, Fasnächtli, das isch denn kummlig,
verfluecht hän d Basler zeerscht my Bracht
und drotzdäm aifach Fasnacht gmacht."
"Gäll, Hölleli, es isch verruggt,
wenn d Bebbi s Fasnachtsfieber druggt,
kai Hinderniss isch dääne z grooss,
die ganzi Schtadt goot ab uff d Schtrooss."
Do paggt d Fra Holle iiri Sache,
zem Abschiid duet d Fra Fasnacht lache:
"Liebs Hölleli, es het mi gfrait,
Dy Bsiechli duet mer nimme laid,
doch näggscht Joor kumm schtatt an dr Fasnacht,
ändlig wiider mol zer Wiehnacht!"

Dr Gottlieb faart im Hoochbryysland
mit finf Wääge-n-ummenand.
Dieffi Bryyse sin s Rezäbbd,
wo-n-är dr Märt drmit beläbbd,
uff dass e jeedi Schwyzer Frau
(hit au d Männer – simmer gnau)
ooni mailewyt go z lauffe
meegligscht ginschtig ka yykauffe.

Au hit no ziert das Dutti-Credo
im heggschte Migros-Boss sy Ego.
Doch jetz sin Pick Pay, Coop und Denner
unterdesse-n-au Bryys-Renner,
drum muess är eppis Neys go sueche
um wytterhin e Gwinn z verbueche:

E Kundekäärtli, doch do git s
statt Gwinn halt numme fuuli Witz.
"Hän Si Cümlüs?" isch hitte
e Synonyym fir Waarte-Zytte,
wil an jeeder Kasse – y wett –
si sicher ain vergässe het.
In dr Schlacht um Maargtaadail
findsch nur mit dieffschte Bryys Dy Hail,
drum bruucht s jetz halt e gross Kalyyber
im Kampf um Kunde-n-und Fimflyyber.
"Budget" haisst dr neyschti Schtraich,
dismol gar nit soone Saich,
die wichtigschte Broduggd zem Lääbe
duet me grien-wyss iiberglääbe
und mit dieffschte Bryys aabiete
um drmit im Bryyskampf z wiete.

Doch au d Konkurränz schlooft nit
und haltet in däm Bryyskampf mit.
Dr Coop isch zeerscht vom Budget gschoggt
doch denne-n-isch är aaneghoggt
und het e Geegemittel gfunde
fir die näggschte Bryyskampf-Runde:
"Prix Garantie", so haisst die Waffe
zem Kunde wiider zue sich z raffe,
die Produggd sin roosaroot
und bringe d Migros glatt in Noot.

Doch d Schlacht isch lang no nit verbyy,
au d Schwoobe mische sich jetz yy:
Es kunnt dr Aldi und dr Lidl
die gebäärde sich ganz ytel
und schtiirze mit de EU-Bryyse
die Yyhaimische grad in d Kryyse.

Und was het das mit uns jetz z due?
Me losst uns aifach nimm in Rue!
Es haisst jetz zwor "Dr Kund isch Keenig"
doch dieffi Bryyse hälfe weenig,
Qualideet wär au e Thema
(doch die basst nit in s Dieffbryys-Schema)
Und denn duet uns no eppis blooge,
das mechte mer jetz doo no frooge:
Was nitze-n-uns die gschpaarte Räppli?
Die länge heggschtens fir e Häppli,
wil s gschpaarte Gäld grad muesch verprasse:
fir Schtyyre-n-und fir Granggekasse!

Scho in Grieche-Getter-Zytte
kunnt die schpoortligi Elytte
als zämme-n-in Olympia:
Wär isch ächt dr beschti Maa?
Au hitte-n-isch dä Bruuch no moodisch,
d Wält, die drifft sich perioodisch,
all vier Joor zem e-n-e Fescht:
Wär isch dismol ächt dr Bescht?

Im spoortlig Wettkampf wird erkoore,
wär gwunne het und wär verloore:
Bim Renne-n-iiber fuffzig Runde
zelle Hundertschtelsekunde,
bim Kuugele-Schtosse misst me schpeeter
d Differänz in Millimeeter.
Ass aine s bis an d Spitze schafft,
zellt Gschiggligkait und Musggelgraft.

E Goldmedaille hänggsch an d Bruscht
(dr Zwaiti Silber – s blybt dr Fruscht)
bekannt wirsch uff dr ganze Wält
und denn machsch ändlig richtig Gäld.
Drumm draumt e jeede insgehaim,
är bring e Goldmedallie haim.
E mängge wird drbyy verloggt
zem Bschysse (au wenn s Gwisse bloggt).

Bisch im Draining numme zwaite
duesch di chemisch vorberaite:
Salbutamol, Cyclofenil,
Clenbuterol und Marsalil,
Carphedon, Terbutalin,
Nandrolon und Ephedrin.
(die Lyschte doo, die längt no nit,
dr Deyfel waiss, was s alls no git.)

Soo wird s Gwinne ganz bequeem,
gääb s doo nit e glai Probleem:
Hättsch die Mittel nit nää sotte,
die sin nämmlig all verbotte.
Kontrolle wärde duuregfiehrt
und d Sinder mänggmol iiberfiehrt.
Was denne gheersch, isch nimm zem loose.
"Schpoortler" mit abgsäggte Hoose,
dien mit Drääne in de fuule
Ussreede sich ummesuule.

De stoosch unter enormem Drugg:
Vertwitscht me di und gisch s Gold zrugg?
Oder kennsch e Drigg, e neye,
as nit dur d Proob duesch duuregheye?
Es zellt nimm dy Kerperlaischtig,
dr Wettkampf lauft jetz nur no gaischtig,
wär duet ächt als bescht bedriege
fir as dr Bschyss nit duet ufffliege?

Es git si au, bi soonige Sache,
weenigi, wo nit mitmache,
uff Doping gwissehaft verzichte,
sich noo-n-em Ideal dien richte,
reeglemässig s bescht brobiere
und doch nur hinte dien rangiere.
Lächerlig! – Me sait doch drum,
dr Eerlig isch und blybt dr Dumm.

Ainedrissig, zwaiedrissig,
dreye-, viere-, finfe-, säggsedrissig,
siibenedrissig, achtedrissig,
nyynedrissig, vierzig.

E haisse Summer, so wie dää,
het s syt Joorhundert nieme gää,
dr ney Rekord wird fabriziert
ass s Thermomeeter explodiert.
In de Troope wär das Klima
fir Baade-Feerie richtig prima,
au bi uns wird d Zyt verdriibe
mit im Rhy-Badhyysli liige,
alli seggle in Badglaider
(bi gwisse Figuure: laider),
gumpe vo de Brugge aabe
und geen in kiele Rhy go baade.
Schläggsch e Glace, all halb Stund,
schnoogsch in Schatte, wie-n-e Hund,
d Hitz aim fescht uff s Hiirni druggt ...
Jetz no schaffe? Bisch veruggt?

Aigetlig wär alles gritzt,
wenn Basel nämmlig bsunders schwitzt,
denn – s isch wirgglig gar nit dumm –
git s, als Schwyzer Unikum,
hitzefrey im ganz Kanton
(fir d Lehrer geege volle Loon)
und d Schieler wäärde noodisnoo
wenn s nyt me bringt in d Freyhait gloo.

Doch dismol – das isch bsunders fyys –
isch fertig mit em Paradyys,
denn d Regierig het beschlosse:
Hitzefrey wird glatt abgschosse!
Uff die Idee, sag ych jetz do,
kenne nur Beamti koo,
wo d Feerie scho im Amt dien gniesse
und noo de drey d Freyzyt begiesse.
Dr Schuelarzt sait, es wuurdi schaade,
wenn d statt biffle wuurdsch go baade,
geeg Ozoon und Iiberhitzig
syg s Schuelhuus halt die beschti Schitzig.
Und au d Glyychstelligs-Emanze
ryybe sich vor Fraid dr Ranze,
kai Muetter miess sich jetz me soorge
um schnäll e Babysitter z bsoorge.
Wääge däm git s also amme
kai hitzefrey me? Dangge, Mamme!

Nyydisch lueg y iiber d Gränze
und gsee, wie d Ländler, ooni z schwänze,
scho zmidaag, y find s drnääbe,
d Beedli offiziell belääbe.

Doch d Basler hogge still und gschlaage
regloos ooni eppis z saage
bi greschter Hitz, s wird als wie schlimmer,
im e Sauna-Glassezimmer.
Im Lehrer wird s au langsam haiss,
sy Hemmligraage sugt dr Schwaiss,
Kyyche, Steene duet me gheere,
was will me denn au doo no lehre?
S dämmered efangs bi mängge,
eb das emänd kenn zämmehängge?
E soo-n-e Schuelbedriib, e myyse,
duet doch mee als glaar bewyyse,
was me syt PISA will verschwyyge
ass d Basler Schieler dimmer syyge.

Y foordere kai Schuelreform,
s wurd länge, d Wirggig wär enorm,
wenn d Schuelhuusdiire wurdsch vo hinde
mit eme Thermostaat verbinde.
Doch in unsrer Polidigg
loost me nit uff my Kritigg,
s Loogisch will e kain yygsee,
drum Hitzefrey – R.I.P.

E Wyybli und e Männli

verzelle-n-amme Schprichli nämmli:

"Liebe ist ..." bi Eehefruscht,

"Aufschwung ist ..." fir no mee Gluscht.

Dr Wiirtschaft goot s scho lenger myys
s Waggstum schtoot uff dinnem Yys
d Folg drvo kasch alldaag gsee:
Nyt als Nyt im Boortmenee.
Si sitzt ganz dief, die gross Miseere,
jommere kasch s dyttlig gheere,
me verliert efangs d Geduld
Wär isch an däm allem dschuld?

Me gseet, wie unsri Wirtschaftsboss,
allmächtig uff em hooche Ross,
Lyt entleen, s isch nit normaal,
drfir verdiene s phenomenaal.
Schpaare-n-und hart duuregryffe,
und denn dief in d Kasse gryffe,
e-n-Abgangsbatze, riisegrooss,
und au dr letscht schtoot uff dr Schtross.
E "Graunding" isch nimm eererierig,
me rueft denn schnäll no dr Regierig,
doch statt die Gselle hart z beschtroffe
wird ne Styyrgäld noochegworffe,
d Gschpeenli uss de (Volggs?-)Parteye
will me schliesslig nit lo gheye.

Poliddiger und Wiirtschaftslyt
die kenne fir das also nyt,
am wiirtschaftlige Misserfolg
isch dschuld ganz aifach s gweenlig Volgg,
wo schtatt dr Wiirtschaft Gäld zuefiere
lieber schpaart schtatt z konsumiere.
E Schtrooff wär doo e z grossi Mie
me will uns lieber umerzie,
e Ghiirnwäsch wär doch doo am beschte,
am liebschte ooni grossi Keschte.

S Rezäpt goot so: Me schtiilt vo friener
(nai, nit eppe Suppehiener)
e Comic-Männli und e -Wyybli
(sicher kaini Basler Dybli)
mischt laami Schprich drzue und riert,
und uff Plaggaat wird s denn serviert:
"Aufschwung ist ... Blablyy Blablaa"
Wär s glaubt, isch dä jetz besser draa?

Die baide häärzige Figuure
sin aigetlig jo seer z beduure:
Vor grauer Zyt hätte si miesse
bi unsere-n-Alte d Luscht lo schpriesse,
doch grad fir das het me, persee,
vyyli Detail gar nit gsee.
Und hit, me wär jo nimm so ghemmt,
sin si no immer glyych verglemmt.

Soll daas eppe dr Uffschwung rette?
Y glaub, s git bessers, mecht y wette.
Indoggdrinatioon haut nit,
so Zyyg, das mache mir nit mit,
soll s wirgglig richtig uffwäärts goo,
denn muess das doch vo inne koo.
Hesch e-n-Idee, denn foo glyy aa,
setz si um, und dängg doch draa,
emol e Misserfolg macht nyt,
die näggscht Idee isch jo nit wyt.
Und sin d Idee mol ussgange,
denn lemmer di doch nit lo hange,
wie wär s emol, wenn du – my Liebe –
wuurdsch Drummle ooder Pfyffe-n-iebe?

Esoo goot s uff und ab mit aim
(nur uffe gott s nur in de Draim)
wirdsch gaischtig fit und keerperlig
und s Lääbe-n-isch nimm eergerlig.
Numme nit fuul ummehogge
wie-n-e Konsumäntemogge.

Mit soonere Philosophyy
drait e jeede drzue byy,
dass es drotz dr Wiirtschaftsnoot
ändlig wiider uffwärts goot.
Villicht isch das jetz halt nit ganz
im Sinn vo unsrer Hoochfinanz,
will die, wenn mir s jetz sälber pagge,
nit alles als Profit yysagge.
Fir die schloot unser Härz halt nit
solang s no zweenig Schtelle git.

Drumm diemmer hit vo Häärze schtraale,
mit Sunneschyyn so richtig praale,
als Zaiche geege Schtimmigsdief
und geege filzwirtschaftlig Mief.

S schrybts bald jeede uff si Faane:
"S Alte wägg – Neis muess aane!"
Dä Spruch, dä losst mi, nundefaane,
maischtens gar nyt guets eraane.

Y reed do nit vo Presidänte
(wo schnäädere wie Schnääderänte),
nit vo Schwyzer Fluggsellschafte
(wo s finanziell halt nimm vergrafte),
nit vo Blaggedde-Kinschtler-Rugge
(womme duet e 2 druff drugge),
nit vom Auf der Mauer Joscht
(dä schrybt, als syg är nim bi Droscht),
und scho gar nit vom Combino
(däm fäält s glaub scho e bitz am Nyywo).
Nur eppis Neis isch wirgglig stargg:
Unsere Sanggt-Jakobs-Pargg!

Stargg isch dr Pargg, nit eppe dr Naame,
wo prangeret uff allne Faane.
Dä Naame dien die Offizielle
jeedes Mol pointiert verzelle,
dr alti Naame wird verdruggt,
d Sponsoore wäärde sunscht veruggt.
Doch kaine loost uff Trotteli,
s isch und blybt halt s Joggeli.
Und deert laufe grossi Sache,
wo aim wiider Fraid dien mache:
Dr Chrigel Gross und syyni Manne
styyge deert in d Marmor-Wanne,
leen sich vom Luxus seer verwenne.
Mer meegen es jo alli genne.
So soorge si mit frische Gliider,
dass d Schlachte ze St. Jakob wiider
gwunne wäärde – s isch e Fraid –
nur d Gäägner diemmer mänggmool laid.
All Samschtig diemmer d Faane hisse,
geen vor grossartiger Kulisse
uff Glappsitzblätz (zwor seer dyyre)
unsren FCB go fyyre.
Nur blooge mi jetz alti Gaischter:
Längt s ächtscht hyyr zem Schwyzer-Maischter?

Doch Schutte isch nit alli Wält,
s nei Joggeli koscht halt vyl Gäld,
drum längt e groosen FCB
zer Finanzierig niene mee.
Uff dr Suechi no mee Wärt
dänggsch an Open-Air-Konzärt,
willsch Muusigstars uff Basel logge –
wär koo isch haut mi uss de Sogge:
D AC/DC het me gsichtet
(s het fascht kaine driiber brichtet),
was fäält, das isch e Superstar,
nit d Liebeskääfer, das isch klar,
s git nummen ain, är blybt ganz logger,
dr Brian Adams (Altstarrogger).
Är isch dr Greescht, zmindescht im Sinn
vo dr Sakia und dr Géraldine.
Doch s Greescht find ych, nit iiberdriibe,
isch dr Raase-Flägge bliibe.

Drotz Uffgebott vo grosse Staare
miesst me immer no z vyl spaare,
gsuecht wird drumm e dritti Quelle,
vo dääre will y jetz verzelle:
Wenn ych als Binggis stier bi gsy,
bim Groosi bin i denn verbyy
und ha, drotz allem "Me git nyt",
bikoo e glaine Glaikredit.
Au doo het me dä Trigg probiert –
Wo het das nummen aanegfiert?
Bi groose Summe bruucht s e Pfand,
drum het me halt no kurzerhand
en Uffbau gmacht mit soonige
dyyren Alterswoonige.
Jetz draime Groosi und Grossbappe
mit root-blaue Dächlikappe
uff den Eereblätz, de hooche,
alte Maischter-Zytte nooche.

D Rächnig, die isch zletschtamänd
nit ganz uffgange, wil si händ
bi allne Plään doch glatt vergässe
d Naduur z beachte und z vermässe.
Verbaut me d Sunne, denn git s doch
im Stadion e Schatteloch.
All Haimspiil mien mir uns jetz zämme
fir dä "scheeni" Raase schämme.

En Umzuug mit eme Rääbeliechtli
hit au nimm e jeede miechti,
lieber Kiirbis, duet me maine,
Rääbe kennt doch kuum me aine.

Mir sin nit grad bekannt als seer e
Volgg, wo uss dr Gschicht wuurd leere.
Was firener guet gsy, isch hit out,
Schlächts derfir blybt uns verdraut.
Mit däm menschligen Effeggt
wird en alte Bruuch erweggt,
wo unseri alten Uuuuurgrossaane
an d Gaischter und die Doote maane.
Dä Bruuch bi uns mit guetem Grund
isch versänggt im Gschichteschlund,
so keltisch gruuslig Rituaal
sin us modäärner Sicht e Quaal.

Die nit immer ganz so helle
Amis wän uns jetz verzelle,
dass dä alti Bruch jo gaar
nit schlimm syg, sondern wunderbaar.
"Fyyret doch im hälle Schyyn
vom Mond mit uns dr Hällowyyn!"

Doch "Amercia, the Great"
het aimol mee dodaal versait:
Wär glaubt bi uns denn no an Gaischter?
– Dr FCB wird Schwyzermaischter? –
Es goot au nit um Traditioon,
eerscht zwai, drei Joor – das wär e Hoon.
Kultuur wär theoreetisch meeglig,
doch die vo dääne macht nit seelig,
vo dääre hämmer glaub scho mee
als gnueg – kaschs glyy bim Määrtblatz gsee.
Was blybt isch byydere Kommeerz,
es zelle Doller und Seschteerz,
und dass das nit e jeede meerggt,
und dass es d Wiirggig no versteerggt,
lauft alles unter aim Signeet:
E Kiirbis, wo men immer gseet.

Orangsch gseesch in jeedem Laade,
Kiirbis-Saiffi git s zem baade,
Fir Auti git s Speziaalvariante
– ganz Smaarti maint my Uurgrossdante –
und willsch in d Disco ain go danze
fliegsch ooni Kiirbis uff dr Ranze.

D Migros macht grad kurzerhand
uss jeedem Gschäft im ganze Land
fir die mit nit ganz soovyl Gält
e Hällowyyn-Erlääbniswält.
Mit sächzig Spezialproduggt
macht si d Schwyzer ganz verruggt.

Jetz waiss men au, warum si in
dr Ryybrugg ooni Stoff mee sin.
Statt Fasnachts-Goschdym-Schnyyder
wäärde jetze Kiirbis-Wyyber
als Kunde dyttlig präferiert,
will s schynts aifach mee rendiert.

Dr Coop isch no vyl konsequänter,
Näbscht Inhalt duuscht är grad no d Gwänder:
S orangsch Loogo muess jetz daarbe
und wäggslet fräch uff Kiirbis-Faarbe.

Die Sicht find ych e bitzli kurz,
die Kiirbis-Gschicht isch wien e Furz,
vyl haissi Luft, en iibel Gschmäggli
(loss d Kiirbis joo nit z lang im Päggli).
Nuur ai Nacht, dr Spuugg isch umme,
zrugg blyyben aimol mee die Dumme,
wo s mit dausige vo Frangge
de Ginggernillishändler dangge.

Machsch das Gschyss aifach nit mit,
denn lyydisch au kai Gäldschwund nit.
Ganz verschoont blybt aber kaine
(was basst do und duet no raime?),
speetischtens am Moorgestraich
gseet men eerscht dr ganzi Saich:
D Binggis mit de Gouvernante
hän Waggis, Blätzlibajass, Dante
als Goschdym aifach nimme gärn .
in isch dr «Jack O'Lantern».

Uff Hällowyyn han ych null Bogg,
hätt ych doch nur e Zauberstogg:
Simsalabim Verschwindibus,
und dr Hällowyyn wär duss!

Bi jeedem glaine Hoosematz
het im Sagg e Natel Blatz.
Laavere duet är wien e Spatz –
I saag nur ains: Halt dr Latz!

Wie isch es denn nur soowyt koo?
Das Gschichtli do, das goot esoo:

In dr gueten alte Zyt
– häär isch die gar nit so wyt –
hesch ussert unsrer PeeTeeTee
bim Deliphoniere niemerts gsee.
Funggtioniert het s zwor als immer,
nur bi de Bryyse – das isch dimmer –
hesch dur s Loch im Boortmenee
d Stitz nur no verschwinde gsee.

Unterwägs goot nyt, muesch yyne
in e Delifoonkabyyne.
Drum hän unseri Beschtler z Bärn,
sich gsait: "Au mir sin doch modärn!
De Ryyche do bi uns im Land
gämmer jetz e Klotz in d Hand."
Was isch das ächtsch? E Batteryy
vomen en Auti? Ka das syy?
He nai, das isch – ojeeminee –
nit vyl mee: e Natel Cee.

Bi soo vyl Gwicht isch d Technigg gfroggt,
d Ääschiniöör, die hän sich bloggt,
so lang bis men e Natel eebe
bis an s Oor het meege heebe.
D Gräät sin als wie glainer woorde,
doch d Bryyse mache wytter Soorge,
do hilft kai Technigg, dasch politisch,
und politisch isch halt krittisch.

Rund um d Schwyz herrscht Konkurränz
und ändlig haisst s au do: "Jetz längt s!"
S Deliphoon wird drennt vor Boscht
– froog nit, was e Brief jetz koscht –
Swisscom haisst das neji Kind
ab jetze wait e neje Wind.
Statt analog im Wälledaal
delifoniersch jetz digitaal,
immer no herrscht Bryyse-Quaal,
näb dr Swisscom hesch kai Waal.

Doch d Swisscom blybt nim lang elai.
Scho git s ai und gly git s zwai
Konkurränten uff em Määrt.
Als Kund bisch bletzlig ebbis wäärt.
D Tarife falle dief in Käller,
si gheien und gheien als wie schnäller,
und s beschti – das isch diggi Boscht –
e Natel nur e Frangge koscht.
Jetz ka – eb arm, eb ryych – e jeede
an sy Oor e Natel heebe,
und laavere bi Daag, bi Nacht,
will dr Bryys nimm vyl ussmacht.

Es soll e jeede Mensch uff Äärde,
emol e Natel-Bsitzer wäärde,
drum wärde scho die glainschte Bubbis
indoggdriniert mit Tele-Tubbies.
Speeter in dr Schuel, s muess syy
s nejschte Gräät, denn bsich drbyy.
Zem cool syy und zem ummegammle
muess am Gurt e Natel bammle.
Au elteri Daame hän im Däschli
e syydig Natel mit eme Mäschli.
E jeedi Dochter, jeede Soon
vom Täll macht sich doch so zem Gloon.

Und wie bi allem het au doo
d Keersytten au sy Gwicht bikoo:
In jeedem nej Antenne-Durm
steggt halt au e Straale-Wurm,
wo zletschtemänd – deerfsch drei mol roote –
dir doch glat duet s Hirn verbroote.

Au d Lärmbelaschtig isch enorm
– bim Laavere kunsch halt schnäll in Form –
an jeedem Egge duet ain welle
em andere sy Gschicht verzelle.
Bisch im Drämmli, gheersch ain schnuure:
"Mr sin jetz grad bim Määrtblatz duure."
Linggs gheersch: "Jetz han ych au ains,
s nejscht und tellscht, s isch ganz e glains!"
Rächts gheersch: "Schatz, no zwai Sekunde,
denn stand i vor dr Diiren unde."
Und suechsch emol e weeneli Rue –
vergiss es, do kunsch nimm drzue.

Y hoff nur ains, do bin y nit elai:
Gäll, an dr Fasnacht, do losch s dehai!!!

D Naduur isch wirgglig genial,
uff en eerschti Bligg zwar rächt banal,
doch kamme schnäll emol entdegge:
D Naduur duet voller Wunder stegge.
Ai winzig Kärnli, e bitz Wasser und Äärde
und scho ka druss e Bliemli wäärde,
wo unseri graui Alldaagswält
mit syynere Farbepracht erhällt.

Ai Blueme lyychtet doo ganz bsunders,
si isch au sunscht e weeneli anders,
si isch die greschti im ganze Land,
si het e gääle Blieterand,
si isch beliebt bi alle Spatze,
si duet aim mit em Stiil gärn kratze,
si git uns Eel fir in Salaat,
si isch fir unser Sujet baraat,
si glyycht emen e lachende Gsicht,
si isch kai Vergiss-mein-nicht,
si muess – gäll das merggsch jetz gly –
si muess e Sunneblueme sy.

Uff dääne tollen Aigeschafte
duet me die Blume jetz behafte,
fir alles meegligi wird si gnoo
und esoo wyt isch s hit koo:

D Oekolooge und die Griene
wären aigetlig no niene,
hätte si nit unverfroore
d Sunneblume zem Logo erkoore.
Ooni die wääre si nämmlig
au hitte no nit salonfähig,
und d Migros hät mit iirem Emblem
fir d Sano-Produggt e bitz Problem.

Au d Buure mache nit dr Gloon,
si richte sich no dr Subventioon.
– Sin Fasnächtler au Buure?
Das wurd mi beduure. –
Wurdsch mit Sunneblueme nyt verdiene
drno gäbs au die Fälder niene.
Nei sitzt dr Buur gar im Sässeli,
drnääbe het er e Kässeli,
d Kunde schufte uff em Fäld,
und zaale drfir au no Gäld.

D Sunneblueme wird jetz au
vo Wisseschaftler ganz genau
untersuecht eb unterdesse
sich no mee Eel losst uusepresse.
Däm Eel haigi d Gsundhait vyl z verdangge,
es syygi nämmlig gsinder als Angge.
Vilicht liess sich gar beschryybe,
wie me drmit kennt en Auti betryybe.
Modärni Schaiche verdiene d Gälder
nit mit Eel-, nai mit Bluemefälder.

E bsundre Fall isch d Sun 21
au doo git s e Sunnebluemepflanzig:
E riise Sunnebluememutant
stoot in dr Stadt ummenand.
Die Konschtruggtion isch zwor nit gscheit,
will amme e Blettli uff d Passante gheit,
drfir hän au mir Bebbi z Basel
eppis vom Kongressgefaasel.

Mit soo vyyl Oekolo- und -nomie
isch jo klar dass sich scho gly
d Mode uf d Sunneblueme duet stiirze
und unseren Alldaag drmit duet wiirze.
D Teenies an dr Streetparade
dängge sich: Mir sin doch gscheit,
mit Plastigg elai wäärde mer ainsam,
Sunneblueme sind au klaidsam.
Das het d Desainer inschpiriert,
d Sunneblueme wird ungeniert
uff Räägeschirm und Klaider druggt,
au Bettwesch und Bikini, nyt isch z veruggt.
D Hobbygärtner dien bim schreebere
No de schenschte Sunneblueme streebere.
Au fir s Eerscht-Auguscht-Abzaiche
muess alles dr Sunneblueme waiche.
An Hochzytte duesch hit nim d Junggselle,
sondern d Sunneblueme zelle,
friener isch als no Rys ummegflooge,
hit lauft s Brutpaar mit emme Bluemebooge.
Und waisch emol nit was schängge,
duesch an Sunneblueme dängge.

Kurz gsait: Efangs in jeedem Egge
duet hit e Sunneblueme stegge.
S wär nit so schlimm, nur z dängge git is:
Wär kuriert die Sunnebluemitis?

Lang isch s här, do het me gmaint,
d Ärde syg e Schyybe,
doch gscheyti Männer hän veraint
brobiert, uns daas uuszdryybe.
Fascht e jeede het denn tscheggt,
d Ärden isch jo kuugelrund,
drfir si zmitzt im Zentrum steggt,
haisst s jetz vo dr Himmelskund.
"Stimmt au nit", muess me denn gsee,
e Bolle simmer, e winzige
im Wältall gits jo no vyl mee ...
Sin mir denn nit die ainzige?

Die Froog, die duet is sythär blooge:
Simmer s oder simmer s nit?
Es wird vyl bhauptet und vyl glooge,
griegsch jeedi Antwort, wo de wit.
Hollywood, wie jeede waiss,
mischlet doo ganz frehlig mit,
mit Star Wars ooder Enterprais,
will s e Huffe dra z verdiene git.
Seggtierer brichten uns vo Getter,
wo d Ärden im ene Ufo bsueche.
Si preedige Hail und Donnerwätter,
nur sinnvolls duesch vergäbe sueche.

Das alles sin Phantaschtereye,
glaube dien das nur die Dimmschte,
s git kai Bewyys, es isch zem Schreye,
doch jetz kunnt doo no s allerschlimmschte:
Hindedure glaubt e jeede,
eb är s zuegit oder nit,
dass uff em Mars es deerten eebe,
doch so Usserirdischi git.
Grieni Männli lääbe deert
uff em Mars, em Roote Planeet;
e Farbkontrascht wo d Logik steert,
doch umso besser me si gseet.

In Glaube an die Griene Männli
sin d Mensche ganz vernarrt,
ooni z dängge wird jetz nämmli
nur no an Himmel gstarrt.
E Virus het is infiziert,
alli griegen e stiere Bligg,
dä Virus nischtet ungeniert
in unsere vergrampfte Gnigg.
Je mee me duet dr Mars betrachte
(deert kasch kaini Männli gsee)
vergisst men unseri Ärde z beachte,
das macht aim in de Auge wee.

Dä Virus lost is gar kai Rueh,
jetz muess unsri Technik aane,
fasziniert luegt me doo zue
und d Keschte kasch nit mol erahne.
Mit glaine Schrittli foot men aa,
e Sputnik duet um d Ärde kraise,
speeter denne kame bald
uff e Mond und zrugg go raise.
Unterdesse will me teschte
wie lang me (das dien d Russe),
ooni Schwäärgraft, ooni feschte
Boode lääbe ka deert usse.
Doch statt Gnocheschwund go mässe
wärde d Närve strapaziert,
und uf dr MIR het me vergässe:
Mit Windows 95 nyt funktioniert.

Mit dr MIR hän s d Russe gschafft,
dass dr Virus fascht besiigt isch worde
und kaine mee dr Mars begafft.
Jetz mache sich au d Amis Sorge.
E Spiilzygauteli wird erfunde
und rasch zem Mars uffe gschiggt,
doch Männli het au äs nit gfunde,
nur Schutt und Gröll het men erbliggt.
Dä Misserfolg, dä losst is kalt,
dr Virus het is fescht im Griff,
näggschtens do brobiere mer s halt
mit Mensche im e Mars-Ruumschiff.

Vyl Keschten und au vyl Uffwand
fir dä Mars-Virus-Furz.
Y froog : Isch das nit allerhand ?
Dänngt me doo nit aifach z kurz?
Uff Ärde hämmer gnueg Probleem,
wo dringend noon ere Leesig schreye.
Hunger, Grieg, s isch nimme scheen.
Doch s Gäld fir e Mars uusekeye?

Zem Schluss verroot y Eych dr Witz:
Uff em Mars sin d Männli, persee,
halt nit grien – nur rooti git s
drum kennet ir si au nie gsee!

Dr Mentsch, es isch en alte Zopf,
het huffewys Gedanggen im Kopf.
Doch d Mentsche sin soziaali Gselle
und wänn iiri Gedanggen den andere verzelle.
Si mache das mit Schwätze und Schryybe,
und grad fiirs letschte gilts dr Deyfel uuszdryybe!
Fir dass dr Lääser dr Schryyber ka verstoo,
het me genaui Reegle zem Schryybe erloo.
In dr Schwyz, in Eestryych und in Dytschland,
nimmt me dooderfir dr DUDE zer Hand.

Doch e Sprooch, das isch e lääbigi Sach,
si veränderet sich laufend, und scho gits Grach,
will e Reegelwärgg us em ainte Joorhundert
im näggschte aim numme no verwundert.
So het men au yygseh, dass dr DUDE vo 1901
e Reförmli bruucht, und nit numme e glains.

E Kommission het me bildet us lutter Expäärte,
wo diskutiert hän, was us em Dytsch soll wärde.
Nummen eppis, wo Generatione hän miesse lehre,
go z ändere, do dien sich vyyli verwehre.
Anderi derfir sin gege Noschtalgyy,
wil Dytsch nit die aifachscht Sprooch soll syy.
Und wil grad au no drey Staate mitreede,
wird d Reform zem e Politikum fir jeede.

Am Ändi het me sich kenne zämmeraffe
und het im Juli 1996 dr neyi DUDE gschaffe.
Numme d Schriftsteller hän gschlooffe,

riefe si "Stop!" und verwärfe d Händ
"Das bringt alles nyt! die Rächtschryybreform
isch schlächt fir s Dytsch und koschtet enorm."
Doch s DUDE-Fieber kame nimm stoppe.
(Vo Intellektuelle loot me sich doch nid foppe.)

Wenn gohts ändlig loos? Ab wenn soll er gälte?
Au doo stehn zwische de Mainige Wälte.
In de Schuele, doo foht me sofort aa,
doch soll e kainen en Noodail druus ha:
Was bishäär richtig, ney aber lätz isch,
wird agstriche- zellt aber nid- das isch praggtisch!
Anderi, wie die vor NZZ, diens Ney so verwalte,
dass si aigeni Leesige voorbehalte
(bi dr BaZ – me kennt das naimedure,
wenns um e Mainig goht halte – halte si d Schnure).
Die Beamte dien, wie immer nyt dängge,
uff Befähl mien si am Stichdaag umschwängge.
Doch alt oder ney isch doch vyylen egaal,
d Rächtschryybig isch und blybt e Quaal!

Jetzt wämmer aber wisse, was isch denn ney?
Fir was gits um dä DUDE soone Gschrey?
Komma derfsch jetzt schryybe, wo de wyt,
d Verständligkait feerderet das aber nit.
Zem zaige was y main, muess folgendes länge:
"Ych begnaadige ihn (,) nit (,) hänge!"
(das uuralt Byspyyl do isch zwoor billig,
ney sin d Komma aber freywillig).
Groos und Glai däät jetzt nimmen uusarte,
die gmässigti Glaischryybig duet me vergääbe erwaarte.
Em " T(h)unfisch het me s "h" jetz gstohle,
doch bim "Thron", do loot me s unverhoole.
Und dr "Stengel" wird zum "Stängel",
bi den Umlut gits e riise Gedrängel.
Au bi Fremdwerter luegt me ganz verduzt,
jetz sin no die letschte "ph" wägbutzt.

Me sait, dr DUDE syyg jetz modäärn.
E modäärneri Sprooch hätt ych au gärn.
Zwor hett men e Huffe neyi Reeglen erloo,
doch wirgglig Neys isch nit uusekoo.
Vylmool kasch zwischen alt und ney wähle,
und dr Lääser muess sich mit de Konsequänze quääle,
Und vyyli Werter, wo me bruucht im Lääbe,
die suecht men au im neye DUDE vergääbe.
im vollen Ärnscht kenne sich die neye DUDE-Gselle
e Sprooch ohni "Wave" und "Snöber" vorstelle.
Kurz gsait, dr grooss Wurf isch es ganz nit.
Wääge däm go Umlehre? Do mach y nit mit!!!

Emänd kunnt aim gar dr schregglig Gedangge:
Gohts de DUDE-Lyt nummen um dr Frangge?
D Buechhandligskasse dien numme so klinge.
D Buechhändler fraie sich und singe:
"Dr ney DUDE kaufe – dr alti ewägg!"
Das entpuppt sich als myyse Regglaame-Gägg!
Was die fyr e Gschrey um dä DUDE mache,
isch schliesslig numme no zem Lache,
mir Baseldytsch-Basler nämme s drum ganz sacht,
bim neye SUTER hämmer soonigs au nit gmacht.

Es isch emmol gsi vor 150 Johr,
doo erfindet e Doggter mit Fettige Hoor,
vom lange Studiere scho halb Plöm-Plöm,
dr Kaugummi – sprich Tschuing-Gömm.

Iber 100 Johr speeter, het e ander Genie
dänggt: "d Lyt sin doch dumm, jetz leeg ich si dryy!"
Wenn alli wän kätsche dänggt sich dää,
no will ych ene ebbis zem Kätsche gää.
Goot Salat, e Weggli und e Plätzli go kaufe,
bauts zämme und duet s ganze "Hämbörger" daufe.
(Häm stoht fir d Luscht, wo de sottsch ha bim Bisse
und Börger fir Burger, wo är duet bschysse).

Wider 50 Johr speeter, 1996 no Christi Geburt
sin die baide Erfinder scho lengschtens furt.
Bliibe isch numme, jä daas isch nit ney,
e baar Milliardäre und e riise Sauerey.

Au z Basel hänn si Yyzug ghalte –
         die zwai Erfindige, die alte.

D Regierig duet sich ärnschthaft frooge,
wie d Freye Stroos belegt soll sy;
doo wurde mir is nit lang blooge,
s sin sowisoo gly Kau-gu-mmi
wo d Freye Stroos dien farbig pinngtle
uff Marmor oder us Asphalt
und wo dr Boode dureluegt
ligt Abfall vome Fastfuud - halt.
(FASTFUUD isch änglisch und duet haisse:
FAST nyt zem Ässe, doch vyl zem FUUTschmaisse).

Kulturstadt Europas Verdrätter vom Schwyzerland
und als Ushängeschild fliegt das McDonald Flugi
(Starte duet die Börger-Kischte ummenand
uusgrächnet ab dr Basler 3-Land-Pischte)
Bis jetz hesch zue dr Crossair doch Vertraue
wäge dr fyyne koscht und de nätte Fraue.
Champagner, Croissants und Öpfelwaie –
jetz soll aim dä Gloon e Bic-Mac aadraie.
Ich gheer dr Moritz Suter scho glaage:
"Bic-Mac und Schämpis, do draits mir dr Maage"
und denne gseesch en ummeflueche
und s nägscht Mool bi dr Swissair bueche.
Fir jedes Museum wwo z Basel muess schliesse,
e neye Börgerschuppe d Tourischte duet griesse.
An de beschte Laage allewyl,
d Kultur, die zahlt halt nit so vyl.
Vilicht wirsch Gourmetstadt bis im Johr Dreyduusig
doch als Kulturstadt dunggt s is – bisch langsam luusig.

Bi dr SBB begryffe mir dä Bic-Mac-Kaare
die mien halt au bim Ässe spaare
und erhoffesich grad uff die Art,
ass me als Junge wider Ziigli fahrt.
Mir Junge Dybli aber maine:
eb Zug, eb Flugi, s brucht e kaine.
Fastfuud-Lääde und Kau-gu-mmi
gits langsam gnueg – leend s doderby
und wenn s scho ebbis mee soll gää:
Mir wurde no mee Fasnacht näh.

My Namme will y Dir nit nenne
Du wurdisch mi jo doch nit kenne
My Haimet das isch 's Zirkuszält
egal wo's stoht uff däre Wält
Ich bi doo – sit vyle Johr
mit rooter Naase, orangsche Hoor
e lachend Gsicht due-n-y mer schmingge
ha z'groossi Schueh, drumm muess y hingge
leeg y denn no my Goschdym aa
no wird y zem e bsundre Maa
vo Brueff bi-n-y e Zirkus-Gloon
Dy Lächle isch my greeschte Lohn

Manege frei! – 's Programm foot aa
als erschts doo kemme d Laie draa
E Schongleur dä schmaisst mit Däller
dr Fyyrreif drait sich immer schnäller
bis aine muetig durespringt
alles klatscht, wo-n-em das glingt
denn d'Elefante, Ross und Affe
bi uns kasch luege, stuune, gaffe.

Wo-n-y denn in d'Manege kumm
do lacht sich 's Publikum halb grumm
bi uns do leen si sich ablängge
wänn nid an Ärnscht vom Lääbe dängge
Vyl git's doch im däglig Lääbe
(vom Zirkus isch's nit wyt dernääbe)
drumm will y Dir au jetz no brichte
vo de Lääbens-Zirkus-Gschichte:

A Bâle het me-n-e Gsetz erloo
das kaa und will ich nid verstoo
es isch e groossi Ironie
und diene duet's em Zirkus Knie
denn d'Rosedaal-Aalag isch gspeert
fir ain, wo nit zue dääne gheert.

Bi uns muesch hit e bitz meh zahle
denn mir hänn syt de letschte Wahle
d'Mehrwärtstyr uffbrummt bikoo
doo wirsch als arme Gloon nimm froh
was haisst denn do au Mehrwärtstyr?
's isch nid meh wärt, 's isch numme dyyr.

E Zirkus vo spezieller Art
trifft dr Zolli-Rüedi hart
e Naashorn haisst's, das haig er gstohle
drum het ihm denn sy Boss befohle
ass er dr Zolli miess verloo
mit abgsägte Hoose stoht er doo.

Am TV gsehsch si Reede schwinge
duurend dien si d'Hymne singe:
"Styyrerlass wird 's arm Volgg griege"
si liege ass sich d'Balgge biege
Politiker dien sich uustoobe
's sin Wahle – nid nur bi de Schwoobe!

Dr Zirkus Suisse in USA
hämmer letschte Summer ghaa
die hänn gschuttet – mir het's gfalle
oh wurd's doch amme au so knalle
wenn y dr Joggeli-Zirkus gseh
nai stopp, dä haisst jo FCB.

Usserdäm, es isch kai Witz:
dr Zirkus vo dr Summerhitz
dr Bolle draumt im Eglisee
vo Winter, Kelti und vyl Schnee
au 's Gabi duet im Büro stööne
"es isch vyl z'haiss", duet alle klööne.

D'Rägeboge-Präss duet brichte
(e Grossdail dien si sälber dichte)
ass es e groosse Magier gäbi
wo mit eme dytsche Model lääbi
Er dät e Zaubersprichli schnure
und lauft dur d'Muur vo China dure
Ysebahne dien verschwinde
an e Gschtell losst är sich binde
und versinggt dermit im See
das isch Magie, wo d' hit kasch gseh
e groossi Show, es zischt und raucht
wenn er denn unverletzt uffdaucht
David Copperfield sy Namme
(begäärt isch är bi alle Dame)
sy Brut isch 's Schiffer Claudia
e Draumfrau dir fascht jeede Maa
d'Hochzytsglogge, heert me saage
lyte fir die in dääne Daage.

's grooss Finale – denn isch Schluss
y zieh my schwäre Mantel uss
bim Abschmigge verlo-n-ich sii
dr Magie-Glitzer dä isch gsii!
Im Härz blyb y e Zirkus-Gloon;
Dy Lächle isch my greeschte Lohn!

Me glaubt scho sit sehr langer Zyt,
ass es Wintergaischter git,
wo d'Sunne stähle und verstegge,
die ganzi Wält mit Schnee zuedegge;
und immer wurdi's Winter blybe,
dät me die Gaischter nit verdrybe!

D'Zircher dien e Leesig kenne,
leen jedes Johr dr Böögg verbrenne,
wenn däm sy Kopf no kurzem knallt,
wird's bis im Herbscht denn nimme kalt;
so fyrt me's "Sächsilüüüüüte"-Fescht
in jeedem Johr, mit bsundre Gescht.

17. Abrille 1993:

"Basler Daag" isch letscht Johr gsi
Zünft und Clique sin derby,
d'Bebbi dien dr Böögg begriesse
und no-n-e bitzli Fasncht gniesse.
Drotz Umziig, Aasproche-n-und Ehre,
losst sich d'Misere nit verwehre;
statt uff em Schyterhuffe z'knalle,
isch dr ganz Böögg abegfalle.

Noo-n-em 18. Abrille 1993:

Im Schnee muesch d'Oschteraier sueche,
doo nitzt kai Bätte-n-und kai Flueche,
au d'Kirsiärnti isch nur glai,
das kunnt vo Schnee und Ys im Mai.
Au's Uusestuehle wär e Hit,
nur's Wätter spiilt derby nit mit.
Alli Feschter in dr Stadt
sin im Rääge nit so glatt;
d'Schwimmbadkasse duet nit stimme
wär bill bi 14 Grad scho schwimme.

D'Wirtschaft stoht in dääne Dääge
eebefalls ganz scheen im Rääge,
iberall isch's abwärts gange,
um e "Dschobb" muesch hitte bange,
au d'Wohnig koscht e riise Batze,
drum hett dr Sepp jetz sy Matratze
under dr Brugg miesse platziere
und duet dr ganzi Summer friere.

Hätt's knallt bim Böögg, wär garantiert
das alles – villicht – nit bassiert.

Dr FCB wird hundert Johr.
wie immer hänn si Groosses vor,
dien Jubileeumsreede schwinge.
Siig um Siig wänn si erringe;
und drotzdäm sin si nit uffgstiige...
ka das an GC Ziiri liige???

D'Frau Dreyfuess leest im Bundeshuus
e Huffe vo Verändrige-n-uus.
E Pulli strigge uff dr Gass
macht dr Frau Bundesreetin Schpass.
Uffgschtellt isch si em Vollg begägnet,
die Frau het's glaub y nit verrägnet.

Wie scho vorhär eexpliziert,
Isch letztscht Johr scho ganz vyl bassiert,
es schynt als gieng's uff däre Wält
um Krieg, um Korruption und Gäld.
Doch ains beruehgt mi unsagbar:
"Nicht nur des Zürchers Schuld es war!"

Zum Schluss, als wär's e guets Gedicht
kunnt no d'Moral vo däre Gschicht:

Wänn d'Ihr Eych das Johr nit blamiere
no diend dr Böögg guet prepariere;
und no-n-e Root ganz näbeby:
LADET KAINI BASLER Y!!!

IM FUFFZÄHNTE JOHRHUNDERT

Es sait e neyi Theorie
d'Ärde ka kai Schybe sy
rund syg si, grad so wie-n-e Balle
wo me nit dät aabefalle.
Die neyi Theorie isch zwor richtig
Doch fir d'Menschhait nit so wichtig.

Nur aine zaigt Inträsse draa
Chrischtof Kolumbus haisst dä Maa
dr Forschigsdrang vo ihm isch grooss
denn ai Idee losst ihn nimm loos:
"Kumm y uff Indie no Weschte?
Dä Gedangge will y teschte!"

Doch wie alles uff dr Wält
koschtet das e Huffe Gäld.
Spanie duet sich intressiere
Und die Rais au finanziere.

Und d'Fahrt ins Ungwissi foot aa,
Doch d'Mannschaft glaubt nit richtig dra
ass me das Indie finde kennt
und nit ins groosse Ungligg rennt.
Wo me denn d'Umkehr scho bespricht
kunnt ändlig 's gsuechte Land in Sicht.

(Bis an sy Ändi glaub er dra
dr Seewäg no Indie gfunde z'ha).

IM ZWANZIGSCHTE JOHRHUNDERT

Was wurd ächt dr Kolumbus saage
gsächt är die Wält in däne Daage?

Statt die halbi Wält z'umrunde,
het är e neye-n-Ärddail gfunde:
Dr Kontinänt Amerika! –
Und 's mächtigscht Land isch d'USA
domools no unzivilisiert,
isch's hit e Macht wo d'Wält regiert.

HOT-DOG, HAMBURGER und PEPSI
mit FAST-FOOD bisch "in" und derby
drum het dangg "Ami's Leibgericht"
jeede zwaite Ibergwicht.
Wenn du trotzdäm gsund wottsch blybe
muesch mit JOGGE d'Zyt verdrybe
bi AEROBIC-Stunde schwitze,
dass dr d'Jeans au richtig sitze.

Erfunde in Amerika
Kennzaichnet "Made in USA".

's letscht Joor ame Septämberdaag
wird z'Minchestai - an scheener Laag -
em Luginbühl sy Yyseplaschtigg
yygweiht, nit numme kurz und haschtig,
nai, ussdähnt, by me Riisefescht
mit Schämpis und illuschtre Gescht.
Es fyyrt "Tout Bâle" und Regio
By däm Enthilligsapéro;
Politigger dien Rede schwinge
d'Katz-Kids derfe Liedli singe
(Kai Reedner hai je singe glehrt,
dorum syg's nit umgekehrt.)
Ych bi sicher, jedi Wett
's isch will e Kind nyt z'saage het.
So kasch derfir dr Striebel gheere
wie-n-är verzellt, "bim Spiile z'leere
wär pädagogisch ideal,
drum isch dr Amboss genial."
An der Rutschbahn demonschtriert
är, wie Physik schyynts funggtioniert.
Me kenn jetz priefe, elf Sekunde
bruuchti är, no syg er dunde.
Är isch oobe aanegsässe
rutscht aabe während d'Lyt dien mässe
ghersch in Applaus der Vischer riefe:
"Me sott das nomol iberpriefe."
Dä vom Christoph-Merian-
Stiftigsroot durgryzt dä Plan.
Es dät nit goo, me miess verstoo,
Der Striebel zwaimool abez'loo.
's griegt denn der Kyburz 's Miggrophon
dä leggt grad loos, mit Stoltz im Toon:
"Will's mi unnemässig frait,
dangg ych bi däre Glägehait
fir das Wärgg wo mir do gsehn
als erscht's em Kinschtler sine Sehn.
Au em Bärnhard", sait er fyrlig
gilt my wermschte Dangg nadyrlig."
Är well de drey au gratuliere
es syg'ne glunge nit z'kopiere.
Der Tinguely hätt sich au schuurig
gfrait dra, jetz isch z'spoot - 's isch druurig
Z'letscht kunnt der Kinschtler sälber z'Wort
Er sait, är frai sich do vor Ort
z'Konschtatiere ass e glaare
Wunsch - z'erlääbe und z'erfahre
daas Publikum ihm neecher bring
wo-n-är derfir der Hammer schwing.
No fyyrt me wyter, isst sich satt
und wartet uff der Bricht im "Blatt".
-'s haig wäg me Spekulant, 's syg schlimm
der "Dino" au sy Plätzli nimm.
E Zircher hätti's indiräggt
kauft, fir e Riisekunschtprojäggt.
Zerscht haig me Grichtli gheert verzelle,
är well e Gugge aanestelle,
so-n-e mittelgrooss wyss Ding
mit Kunschtdrugg druff - derfir nyt drin.
Derno kunnt uus, 's isch gar nit wohr
me haig mit Käslaib iber Johr
und Daag e Plaschtigger bestoche
nit ebbe zem e Fondue koche,
nai, d'Idee isch: 's wäri nätt,
wemme e Luginbühl dert hätt.
Dä het z'erscht lang nyt welle wisse
und gsait: ihm sig e suuber Gwisse
wichtiger als dräggig Gäld,
das gäb's scho z'vyyl uff däre Wält.
(Dä waiss no nit, sunscht hätt er rächt:
Gäld stinggt nit, aber Kääs wird schlächt.)
Wo-n-em der Kääs zem Hals uushänggt
froggt sich der Luginbühl und dänggt
bis hitte suecht me umesunscht
was d'Familie fiehrt zer Kunscht.
Drum schloot är syne Sehn grad vor,
's syg intressant und ohni Gfohr
e-n-Yysekuntschtwärgg zämme z'baue
wo me nit numme kennti bschaue,
nai - es syg em ärnscht derby
es miessti au zem Spiile sy.
Wenn d'meh wisse wottsch dervoo,
no sottisch in d G-80 goo...

's letscht Joor ame Septämberdaag
wird z'Minchestai - an scheener Laag -
em Luginbühl sy Yyseplaschtigg
yygweiht, nit numme kurz und haschtig,
nai, ussdähnt, by me Riisefescht
mit Schämpis und illuschtre Gescht.
Es fyyrt "Tout Bâle" und Regio
By däm Enthilligsapéro;
Politigger dien Rede schwinge
d'Katz-Kids derfe Liedli singe
(Kai Reedner hai je singe glehrt,
dorum syg's nit umgekehrt.)
Ych bi sicher, jedi Wett
's isch will e Kind nyt z'saage het.
So kasch derfir dr Striebel gheere
wie-n-är verzellt, "bim Spiile z'leere
wär pädagogisch ideal,
drum isch dr Amboss genial."
An der Rutschbahn demonschtriert
är, wie Physik schyynts funggtioniert.
Me kenn jetz priefe, elf Sekunde
bruuchti är, no syg er dunde.
Är isch oobe aanegsässe
rutscht aabe während d'Lyt dien mässe
ghersch in Applaus der Vischer riefe:
"Me sott das nomol iberpriefe."
Dä vom Christoph-Merian-
Stiftigsroot durgryzt dä Plan.
Es dät nit goo, me miess verstoo,
Der Striebel zwaimool abez'loo.
's griegt denn der Kyburz 's Miggrophon
dä leggt grad loos, mit Stoltz im Toon:
"Will's mi unnemässig frait,
dangg ych bi däre Glägehait
fir das Wärgg wo mir do gsehn
als erscht's em Kinschtler sine Sehn.
Au em Bärnhard", sait er fyrlig
gilt my wermschte Dangg nadyrlig."
Är well de drey au gratuliere
es syg'ne glunge nit z'kopiere.
Der Tinguely hätt sich au schuurig
gfrait dra, jetz isch z'spoot - 's isch druurig
Z'letscht kunnt der Kinschtler sälber z'Wort
Er sait, är frai sich do vor Ort
z'Konschtatiere ass e glaare
Wunsch - z'erlääbe und z'erfahre
daas Publikum ihm neecher bring
wo-n-är derfir der Hammer schwing.
No fyyrt me wyter, isst sich satt
und wartet uff der Bricht im "Blatt".
-'s haig wäg me Spekulant, 's syg schlimm
der "Dino" au sy Plätzli nimm.
E Zircher hätti's indiräggt
kauft, fir e Riisekunschtprojäggt.
Zerscht haig me Grichtli gheert verzelle,
är well e Gugge aanestelle,
so-n-e mittelgrooss wyss Ding
mit Kunschtdrugg druff - derfir nyt drin.
Derno kunnt uus, 's isch gar nit wohr
me haig mit Käslaib iber Johr
und Daag e Plaschtigger bestoche
nit ebbe zem e Fondue koche,
nai, d'Idee isch: 's wäri nätt,
wemme e Luginbühl dert hätt.
Dä het z'erscht lang nyt welle wisse
und gsait: ihm sig e suuber Gwisse
wichtiger als dräggig Gäld,
das gäb's scho z'vyyl uff däre Wält.
(Dä waiss no nit, sunscht hätt er rächt:
Gäld stinggt nit, aber Kääs wird schlächt.)
Wo-n-em der Kääs zem Hals uushänggt
froggt sich der Luginbühl und dänggt
bis hitte suecht me umesunscht
was d'Familie fiehrt zer Kunscht.
Drum schloot är syne Sehn grad vor,
's syg intressant und ohni Gfohr
e-n-Yysekuntschtwärgg zämme z'baue
wo me nit numme kennti bschaue,
nai - es syg em ärnscht derby
es miessti au zem Spiile sy.
Wenn d'meh wisse wottsch dervoo,
no sottisch in d G-80 goo...

Spieglein, Spieglein an der Wand
wär isch d'Määrlidante do im Land?
Wär liist denn scho syt 50 Joor
uns Kinder all die Gschichtli vor
und wär isch erscht grad 70 gsy?
Das ka nur 's Trudi Gärschter sy!

"Es war einmal" - das kennt e jede
"So fangts aa" - duet 's Trudi rede.
au im Groossroot ischs eso
drum het me mii dert yne gno.
Nach 12 Johr ha-n-y nimme welle,
mecht lieber Määrli Eych verzelle."
Wie 's ainte vo de 7 Zwärgli,
wo hinter ihre 7 Bärge
's Schneewiitli gschitzt het in dr Not
wo ihm vo dr beese Mueter droht.
Bis denn e Keenigssohn isch ko
und ihns zue syner Frau het gno.
's Rootkäppli isch go Bliemli sueche,
will äs sy Grosi wett go bsueche.
Doch laider kunnt äs dert nit aa,
dr Wolf hets vorhär gfrässe gha.
So verzellt Si uns das druurig Stigg,
doch 's Aend isch voller Fraid und Gligg.

Au bi de Brieder Grimm kasch läse
vo Zauberer und Häxebääse,
vom Prinzässli ganz in Lumpe
und vo däm duumegroosse Stumpe.
Was do denn no kenntsch alles nenne,
wo villicht gar nit alli kenne.

E Raiberbandi zieht dur d'Wält
und het e Hehli voller Gäld.
D'Lyt hänn ene hinde nooche gjagt
und hänn die Brieder denn au paggt.
D'Moral vo däre Gschicht die isch:
Wirsch gschnappt wenn d e Verbrächer bisch!

Mir Glaine sinn's wo das verstehn
will mir's mit Kinderauge gsehn.
Die Erwaggsene - hänn die's verlehrt?
Hänn si die Gschichte z'lang nimm gheert?
Schnäll muess alles nur no goo,
mir kenne das nit rächt verstoh!

Was isch in - und was isch doof?
Git's e Skandal am Keenigshof?
Wär isch nach Gschdaad in d'Ferie gfahre?
Wo drifft me d'Prominänz in Schaare?
Und wo sinn all die Helde bliibe?
In dr Räägeboogepräss stoht's gschriibe!

Und usser allem Tratsch und Klatsch,
wär het butzt am Fuessballmatsch?
Wär het e Titel sich errunge?
Wäm isch dr Wältrekord misslunge?
Daag-dääglig duet me sonigs brichte.
's sinn halt de Groosse-n-ihri Gschichte.

Gsehsch, d'Määrli die gehn nie verby,
die Groosse hänn au Fantasie
und hänn die Zyt no nit vergässe,
wo ihri Mamme dert isch gsässe,
am Rand vom glaine Kinderbett
und all die Määrli glääse het.

Hit sin die Lyt scho alli grooss.
Hänn sälber Kinder uff em Schooss,
wo sich au immer scho uff's neje
an de-n-alte Gschichte fraie.
Zem mit em Trudi Gärschter z'ände,
wänn mir do ihri Wort verwände:

"Und wenn sie nicht gestorben sind,
so leben sie noch heute!"

(Mir Junge sin zwor erscht 10)

Liebe Lääser, stohsch jetzt am Stroosserand
Und zwyflisch womeeglig am aigne Verstand?
Was het au e Gloon mit däm Süschee z'due?
Gäll, die Froog bloggt Di und losst Dir kai Rueh!?
Gwiis hesch scho vermuetet und Dir dänggt
Ass es mit em Jubileum zämmehänggt.
Aber wie und wiso lychtet Dir nit y.
Zem's begryffe muesch aber kai Hälle sy:
Am Cortège wird als Gloon marschiert,
Will dä so träffend symbolisiert.
No unserer Mainig isch d'Assoziation
Zue "freywillig Schaffe" ebbe-n-e Gloon.
(Aber lang nit alli, eb Maa, eb Wybli,
Sin Arbetsdier doo bi de Dybli).
Fescht stoht: D'Fasnacht hätt nimm vyl z'lache
Wenn kain mee wurd dr Gloon go mache.
Und wurd kain mee dr Gloon fir d'Madame spile
Miestisch in dr Regio no Ersatz go schile.
Iibrig blybti am Änd numme no dr Karneval
Dä vo Mainz, wo singt und lacht, und Masggeball!
(Und dä Bruch no Basel z'importiere
Hänn 's letscht Johr scho-n-e baar welle probiere.
Fascht hätt's de Gnuschti welle glinge
Dervo ka dr Schoellkopf e Liedli singe!)
Die grässlig-abscheyligi Horrorvision
Isch fir 's Schaffe die ideal Motivation.
Also fiere die Gleen ohni dummi Schnure
Fir d'Fasnacht jede-n-Ufftrag dure:
Zem Bischpyl bim Requisit-Konstruiere,
Ladärne-Spanne, -Laggiere, -Montiere.
Au das muess dr no under d'Nase rybe:
Glych lauft's au bim Zeedelschrybe!
(Und 's git, gwiisermaasse als Alibiaktion
Spezialgleen fir d'Süscheekommission.)
Und wenn me ebber bruucht zem Goschdymnaie
Nimmt me aifach d'Mammene uus unsre Raie...
Zämmefassend waiss ych bschaide z'brichte:
Uff uns Gleen ka kai Clique verzichte!
Zue Läbzyte aber griegsch nyt gschänggt,
An so Gleen wird erscht bim Jubiliere dänggt.
Die Idee isch glych genial wie billig,

Das muess Y zuegäh (wenn au widerwillig!).
Du kasch villicht iber so Gleen numme lache,
Will Du sälber kai Fasnacht duesch mache
Liggsch mit däre Aasicht aber dernäbe:
Dr Gloon spilsch au Du - im Alltagslääbe!
Sag, wie stoht's mit Verwandte, Bekannte,
Kollege, Nochber, Unggle-n-und Dante?
Die, wo D' greylig findsch zwischedure
Und glych dr Gloon machsch ohni z'Mure...?
Uus guetem Grund het aber kain dr Maage,
Dir fräch "Gloon" in's Gsicht go saage.
Vo soo aim ka me nur profitiere,
Drum will me Dii, Gloon, nit verliere.
So-n-e Gloon syg halt aifach unentbehrlig,
Gstoht 's Dante Trudi mir ganz ehrlig...
Du machsch ere Bsiechli, wo Dir stingge,
Bringsch em Unggle d'Anit-Rheuma-Fingge,
wenn är gmietlig vor em Färnseh hoggt.
Und falls en trotz Fingge 's Rheuma bloggt,
Machsch Essigwiggel, probiersch's mit "Chemie"
Holsch dr Bringgmaa fir e Schlamm-Therapie.
Em Grossbabbe hilfsch dr Raase stutze,
Em Gotti z'Rieche duesch d'Fänschter butze,
Dernoo hilfsch en Schangi sy Waage wäsche,
Dr Grossmamme draisch Du d'Ykaufsdäsche,
Zem Schluss tapeziersch dehaim no d'Wänd.
Bref: D'Gloonerie nimmt und nimmt kai Änd!
Gib's zue, Du benimmsch Di numme-n-esoo,
Will uff kai Fall Dii wottsch enterbe loo!

Ych glaub, Du hesch 's Gloon-Prinzip kapiert,
Au ass es iberall guet funktioniert!
(Vom Bruefsläbe wämmer iberhaupt nit reede,
Wie's dert lauft das waiss wohrschynlig jeede)
Zuegää: 's Gloon-Läbe isch kai Schlägg,
Doch schläggt das kai Gais ewägg:
Als Gloon spiilsch dr Dubel rund um d'Uhr,
Derfir hesch e freehligi Natur!

Wenn e Dybli frogsch: Hesch 's Gfyhl
Fimfezwanzig Joor sinn vyl?
Sait äs: Nai, das wäär vermässe,
Soone Fescht kaasch glatt vergässe,
's isch e Marschhalt nur, e nätte!
Und denn duet's im Stille bätte:
Gäll, Frau Fasnacht, bitt scheen bitt,
Mach, ass' uns no rächt lang git!

D'Basler Birger sin halt guet
glar, es brucht e bitzli Muet
me goht mit "Bayern" digg ins Gschäft
em Josef Strauss wird's richtig schlächt
d'Barbara Frey leggt ihm e Bladde
ab jetz schtoht Basel nimm im Schadde
mir hän Insäggte griegt, zig-duusig
e Dail dervo sin wirgglig gruusig
mit vier, mit säggs und nomeh Fiess
(verainzelt findsch das au im Gmies).
Die im Museum syge zwor doot
d'Frau Saresy seht drotzdäm root
zer Frindyn maint si ganz schoggiert
y hoff die Käfer sin blombiert
denn die hän Fyhler, Schäre, Zange,
e Dail loht d'Fligel schwär lo hange.
Die Käfer sin sortiert noo Arte
d'Härkunft schtoht au uff dr Karte
erscht no die Farbe wo kasch bschaue
dr Picasso wurds do glatt umhaue
's hett schwarzi Dierli, grieni, bruuni, rooti
mer hoffe nur, 's sin alles dooti.
Zem Fische nimmt me mänggmool Maade
dr Hogge hänggt an Silgg und Faade
die Sammlig sott e zytlang gniege
wenn d'Fischer kaini Schwarzkepf griege
duet e Fisch in dä Keeder bysse
bikunnt er hindedry grad 's Rysse.
Guet glageret und scheen sortiert
eso hän's die no nie brobiert,
nur zwai Millioone dien si koschte
(fir uns Bebbi gar kai Boschte)
gnabb e Frangge macht's pro Schtigg
dasch doch fir Basel wirgglig Gligg
me het scho fir weniger vyl meh zahlt
und mit däm Grimpel au no "prahlt"
dängg nur an dä Kaare vom sälige Beuys
dasch fir uns no hitte Gschmeys.
Me kennt vyllicht e Netzli schpanne
maint aine in der Basler Kanne
dr Schaggi uus em Spalebärg
(e so-n-e glaine digge Zwärg)
sait ganz druurig: 's blybt derby
eso wie friehner kaa's nimm sy.
Basel syg e Sammelstadt
doch hämmer 's Sammle langsam satt
vor allem denn wenn's immer widder
sich handlet um e Huffe Glidder.
Dr Fittkau uus em Minchner Zolli
findet die Idee kai tolli
denn will är bschaue Käller-Assle
muess är gschwind uff Basel rassle
me sott däm Maa vyllicht bybringe
muesch nid lache, 's kennt jo glinge
im "Bayrische Wald" do kennt me schweere
kasch Borggekäfer seh und heere
drum solle d'Schwoobe, sait me gärn,
statt uff Basel go, no Bärn.

Mechtsch Maiekäferli goh sueche
kasch's glatt vergässe, due's abbueche
dr letscht kasch im Museum finde
ganz oobe linggs und erscht no hinde.
Zem Schluss e Dangg an d'Barbara
und sälbverschtändlig ihrem Maa.

Im Gschichtsbuech findsch wenn duesch luege
vor Fraid jaggt's aim fascht us de Fuege
urschpringlig schtammt die Zircherschtadt
vo de Reemer ab, dasch glatt
denn mir am Rhy hänn scho lang g'funde
die basse nit so rächt in d'Runde
es sinn e bsundri Glass vo Rasse
die kenne nie zem Schwyzer basse
es maint eso-n-e Zircher Schlampe
worum dien d'Basler uns verdrampe
glaubet uns das muess so sy
mir kenne ohni das nimm sy
denn Alemanne no de Reemer
scho kasch gseh 's wird als wie scheener
die Vergangehait vo däne
muess me hit aifach erwähne
d'Aidgenosse hänn versait
und eso sich sälber glait
d'Urkanteen hän d'Zircher welle
au das sin laider dummi Gselle
denn aimool dinn, griegsch kain me uuse
dasch nit zem lache, 's kennt aim gruuse
Ob Ticino-Wallis-Bärn
die gseht alli zämme gärn.
Fahrsch Du uff dr Autibahn
mit Familie 's isch dr Wahn
ganz bletzlig hesch vor dir e Waage
e Z + H scho blatzt dr Graage
griegsch Maagebrenne 's isch zem schiesse
dr Sunntig kabutt 's nit sy miesse
und jetze uff das alles aabe
heersch iberall - au vo de Schaabe
oh Turicum, oh Turicum!
sin Dir denn wirgglig eso dumm?
E groosses "Fäscht" stellt me uff d'Bai
sin Ihr fir das nit e Nummere z'glai?
syg Ziri worde, dasch zwor wohr
Dr Grund isch dä: Zwaidausig Johr
bi uns hätt das kain publiziert
e Bebbi hätt sich do scheniert
me duet e Frau doch au nit blooge
und si no ihrem Alter frooge
diplomatisch goht me vor
eso kunnsch wyter, 's isch doch wohr
nit wie-n-e-n-Elephant im Glas
sicher nit, was soll denn das
am "Fäscht" sälber wär's no gange
doch e baar lehn d'Kepf scho hange
die hän e weeneli z'vyl drungge
däne hätt's dehaim scho gstungge
ai Gschyss, ai Wäse, ai gross Gstirm
vor luter Lärm bikunnsch no Wirm.
E Flugi kurvt obe-n-am Himmel
e Hochzytskutsche ziehn vier Schimmel
nu derscht no 's Brutpaar, 's blybt derby
muess grad so alt wie Ziri sy.
Dr Monti saust als Aggbrobat
iber d'Limmat, dasch denn hart
mit rot und wyss duet är schongliere
blau-wyss goht nit, wägem scheniere
ganz dyttlig muess me das hit saage
me stellt nur fescht, ganz ohni z'glaage
's diggscht an däm "Fäscht" zwaidausig Johr
isch‚ 's Fyrwärgg gsi, dasch wirgglig wohr
's het gfungglet, kracht und heerlig blitzt
Jeede het bleed uffeglitzt
e Räägebooge isch e Saich
isch näbedra grad blass und blaich
e groosse Schneeri het uns gsait
hoffentlig het uns dä nit glait
e Kinschtler haig das uff d'Gnoche gschtellt
doch wird au näbeby verzellt
soo ain kenn nie vo Ziri sy
dä kunnt vo Basel, am scheene Rhy!

Als seriees luegsch 's Banggschäft a
e suuber Gschäft 's isch alles dra
wen sottsch Gäld ha, denn gosch ahne
fir das git's Bangge nundefahne
am Schalter holsch e Formular
noh drei vier Daag isch alles glar
dr Glidder griegsch grad wie de wotsch
me bliggt halt dure, me isch kai Dotsch
dä Gsell wo hinterem Schalter schtoht
waiss genau wie das so goht.
Du schtohsch in dynere Biggse
d'Schueh hesch vergässe z'wiggse
bisch s'nid gweent als glaine Gnächt
hesch's au nid gleert das Banggerächt
doch Ains weiss wirgglig jede Simpel
bruuch's lieber nid, dä ganzi Grimpel.
Friehner isch es jo no gange
bisch ahne gange unbefange
Atmosphäre rain und suuber
ohni Schminggerey und Buder
au die Heere Diräggdore
hän vor hundert Joore gschwore
mer mien uns Ains vor Auge halte
aaschtändig muesch e Bangg verwalte
sicher sy in allne Laage
nur e-so git's kaini Glaage
bisch rächt a-zooge, guet rasiert
nimme Taxi wenn's bressiert
fascht alles darf me bi und mache
doch kum nid z'spoht, hesch nyt meh z'lache
bi uns stoht pinggtig si ganz oobe
schliesslig simmer kaini Schwoobe
doch ändere soll sich das scho gly
mir frooge uns, muess das denn sy
dss Dradition soll undergoh
macht uns aifach nid ganz froh
jetzt soll das anderscht wärde
mit de Bangge do uff Ärde
bi de Schefe foht's scho a
denn derte kemme Andri dra
e "Punker" soll ganz oobe sitze
doch wäge dämm muesch nonig schwitze
mit Giggelfrisur und alte Limpe
in dr Schneere no zwai Schtimpe
d'Fingernägel mit Druurränder
dass sig modärn, me froggt was wänder
in dr Bangg laufsch barfuess umme
denn Schueh dreyt hit nur no e Dumme
au mit de Grawatte isch's verby
schatt Druubesaft dringgsch Wy
als Kund wirdsch au nimm glych bedient
neyerdings wird mehr verdient
e Glaigredit muesch gar nimm welle
e Grosse duet jetzt nur no zelle
nadyrlig zahlsch fir das mehr Zinse
me schpart bim Ässe und frisst Linse
dämentsprächend 's Personal
d'Frau Sarasin findet das e Qual
denn wo si isch an Schalter gloffe
hett dä hinter-em Glas Ain gsoffe
dur d'Luftschlitz heersch e Geerpslerey
schtingge duet's wie in-ne-re Mosterey.
Wie scheen isch's gsi zer alte Zyt
doch lang scho här, z'rugg liggt's wyt
mir winsche nämmli nie uf Ärde
dass unseri Bangge so dien wärde
denn alli Bebbi hoffe nit
dass es e "Punker" Big Boss git.

Do macht aine x-beliebig,
mit uns e-n-Iberläbigs-Iebig.
Uff beide Syte, vo dr Schtrooss,
froge d'Lyt, was isch au los?...
Derf'sch drey mool rote, was isch das?
E Tableau, e Fläsche - und e Glas,
am Rugge no e Nummere,
e Postuur, wie-ne Gugummere,
nach drey Minute, dr Krampf scho in de Wade,
das isch aine, vo dr Källner-Olympiade.
Dä Källner-Wettlauf, in dr Schteine,
isch e Hit, es glaubt's jo kaine,
wo noch-e-re guete Schund,
ändlig aine z'seggle kunnt.
Dr zweit kunnt au, wo scho lycht hingt,
dir dritti, wo nach Pommfrid schtingt.
Denn, zem grosse Schregge,
s'Emmeli, vom "Schiefe-Egge".
Au die finft will sich bewähre,
s'isch s Lyseli, vom schwarze Bäre,
Vo dr Haseburg, uff schnälle Sohle,
kunnt ain, au dä will no e Prysli hole,
me kas's durch sini Laggschueh gseh,
däm mache d'Hienerauge weh.
Ain rast abe, ganz befange,
vermuetlig isch em d'Luft usgange.
Jetzt duet aine, alli iberhole,
dä het sicher ebbis gstohle.
Dr nägscht griegt pletzlig schiss,
vor-em erschte Hindernis.
S'Glas het dä am Schtart scho gsoffe,
drum het er s'Schprungbrätt au nid troffe.
Denn vergoht e Viertelschtund,
bis ändlig wiider aine kunnt.
Wie-ne Pinguin vom Nordpool unde[,]
he[t] dä e schwarze Lätsch umbunde.
Nytmeh het er uff sim Täller,
drum isch dä au e bitzli schnäller.
Die Schtregi isch doch gar kei Laischtig,
weder kerperlig, no gaischtig.
Dr Blueme-Fritz, wurd samt sim Kaare,
sicher schnäller durefahre.
Dr Mum het me uns scheen abkauft,
will usser de Källner iberhaupt nyt lauft,
und die sin obe-nabe-ko,
hesch gmeint, im Zolli het ain d'Tiire offe glo.
Schtatt so-ne Källner-Düüse-Olympiade,
wurd's beschtimmt doch au nyt schade,
wenn in dr Baiz e Langlauf-Dotsch,
schnäller frooge wurd, was suffe wotsch.
So wie si seggle in dr Schteine,
segglet in dr Baiz jo wirklig kaine.
Losset die im nägschde Winter,
als LPausch fir alli Bebbi-Kinder,
bi-me-ne wunder scheene Ryffe,
dr Schpalebuggel abeschliffe.
Das wär doch sicher eifach z'mache,
wenigschtens kennt me denn lache.
Die wurd's trotz allem Gottvertraue,
alli uff e Ranze haue.
Mechte dir das nid probiere?
Als eych nomool, so blamiere?

Dr Moodekönig sait, wo's duregoht
Laider git's e kain, wo ihm uff d'Schnure schloot

Die Mafia in de Zyttige,
Vo Genève bis uff Itige,
Vo Basel bis an Boodesee,
Vo Bellenz bis uff Château d'Oex,
Die duet aim nonstop glatt verfiehre.
Mir goht das ehrlig gsait an d'Niere.

Äne, dääne, dubeldee
Hesch die Inseraat scho gseh?

Syg's e Färnseh-Spot am Oobe,
Syg's e Heftli vo de Schwoobe,
Syg's e Montere-n-im Stedtli,
Syg's e ganz gscheyt Eltere-Blettli:
's wird fir jede Schyssdrägg gworbe.
Scho als Buschi wirsch verdorbe.

Kaasch di wehre wie de wotsch
Wenn nid mitmachsch bisch e Dotsch

Rytter-Hoose-Look will d'Dochter,
Fridensduech dr Bueb (druff pocht er).
Plus e Däschli oder Mäppli
Und e Regazzoni-Käppli.
Statt im Johr aimool in Zolli,
Lieber jede Daag e Lolly.

Hesch dehaim kai Glotzophon
Kunnt "Uff Broob!" dy glaine Sohn

's foot jo scho bim Färnseh aa.
D'Lehrere sait: Dängget draa,
Lueget alli d'Kinderstund.
's git e-n-Uffsatz driber und
Wäär nyt waiss, dää griegt Stroofizge
Wie bim letschte Moole d'Schnyzge!

Ellerli, bellerli, ribbedira
Kaufsch es nit, denn bisch kai Maa

Waas, das kaasch du dir nit laischte?
Die Artiggel hänn die maischte!
Wenn nit mitmachsch, isch dy Glaine
Vo de-n-Allerermschte-n-aine.
Nur die wirgglig letschte Goofe
Hänn das noonig – nur die Doofe!

's isch e ganzi Induschtry
's goht nit lang und scho keysch dry

An dr Wiehnacht underem Bäumli
Sehsch die glaine Kinderträumli:
Schach-Computer, Rollschueh-Roller,
Auto färngstyrt, oder toller:
Tele-Spili-Apperäätli,
Mofa-Helm mit Doonband-Gräätli.

Es schängge-n-Unggle, Dante, Götti
Tangg und Gwehr, was me nit sötti

Kensch dää Gääg – er isch ganz ney –
Auto-Rennbahn kryzigsfrey?
Oder darf's vellichte sy
D'Binggis-Spittel-Chirurgy?
"Kinder-Labor" haisst e Trend
(Zoobe-n-isch 's Huus aabebrennt!)

Dr Rousseau sait: Mach's wiene Buur
Denn gsundsch au du – zrugg zer Natuur!

Hesch e bsunders guete Riecher,
Groomsch de Junge scheeni Biecher,
Schänggsch e Hindli oder Kätzli,
Drummle, Piccolo und Blätzli-
Bajass fir die scheenschte Dääg
Wo mir hänn und denn bisch zwääg!

Die Mattebliemli-Plaite-Schau
– Grien Achtzig haisst si z'Basel au –
Isch drotz em Baize-Paradys
Vom Bsuech häär liederlig bis mys.
Als Rettig, maint e Gärtnerschurz,
Kennt hälfe doo sy Rise-Furz.

Är het e Dräffe-n-aarangiert
Und alli Zwäärge zämmegfiehrt.
E Cortège wie am Jugendfescht
Mit numme ganz illuschtre Gescht.
Im Vordraab lauft e Guggemuusig
Uus Ziri – das isch schaad und gruusig.

Im Cheese sy Talk-Show schliesst sich aa:
E niveaulooses Zwäärg-Blabla.
Dr Giftzwäärg -sten, das Rumpelstilzli,
Dää schnitzt in Määrtbricht Fliegepilzli.
Dr Lotze-Zwäärg lauft hindedraa –
Wie immer: d'Rootwy-Kabbe-n-aa.

E Super-Zwäärg im Dalbedaal
Haisst Siber vulgo Rübezahl.
Drotz häggele-n-und spättele
Duet's im sy Schau verjättele.
Es haut fascht uus de Söggeli
Dää Pausegloon Sandöggeli.

Helvetia, dy neyschte Drumpf
Haisst Leon: 's isch jo au e Schlumpf.
Dää schlööfelet dief hinderem Bäärgli
Mit syne sächs Kolleege-Zwäärgli.
Die darf me wirgglig nit verjaage –
Si kennte kuum ihr Huttli draage.

Zwäärg Nase sait zem Mainzelmännli:
"Kumm, mir fahre mit em Drämmli.
Kenntsch e Billjeh uuseloo
Uus däm Apperäätli doo.
I bi Doctor summa cum
Laude zwoor, doch aifach z'dumm".

Die maischte Lyt hänn gar kai Mumm
Uff das Zwäärg-Symposium.
E Warmbluet-Zwäärge-Defilee
Kaasch jo an jeedem Donnschdig gseh
Wenn d'Gnööm – ganz ohni z'muggere –
Ins Roothuus gehn go gluggere.

Es isch ych sags e Hundelääbe,
E Katzejammer, ganz drnääbe,
Was doo duet koo uus em Land vom Ryys
E Blastigviich – ych find das miis.
In ire Stedt, wo d Wolke kratze
Und fascht us alle Fuege blatze,
Deert isch das Blastigviich begäärt,
As richtigs Dier, wärs dert nitt läbenswärt
Aaber wie daas so isch, doo in Europa,
Mien mir halt jede Minggis au ha.
Sigs us Amerika, Japan oder China,
Sigs no so bleed, mir mien daas au ha.
E männgem Kind si grosses Schätzli
Isch nimm dr Hamschter oder s'Kätzli,
E Hindli, s'Veegeli oder e Muus,
Nai – e Blastigstigg us em Waarehuus.
Bi uns kasch wenigschtens no in dr d'Albe,
Aini gsee mit irne Säuli ummetschalpe.
Und au bim Felix Felix in dr Elsbethe
wirds no soowit koo,
dass me statt mit em Dierli,
mit siim Tamagotschi duet goo.
Statt em Gebälle und Geknurre,
herrscht denn Gepipse und Gesurre,
AMEN
Sisch bald sowit, dass di Frind oder d'Frindin
E Blastigersatz isch wie dr Hund oder d'Hyndin.
Dass bi de Junge Basler Dybli
Blastigaier laufe, statt Männli ud Wybli,
Wo elektronisch dien drummle und pfiife,
NAY – daas kenne mir nimme begriife.

"Es lebe das Haustier" in Fleisch und Bluet,
Salli zämme, machets guet.

E männgi Clique stoot im Noochwuggskampf
Und drait derbyy gar männge Grampf,
Wirbt mit Raise und mit Gäld,
Mit Ferie in dr halbe Wält,
Wenn d'drummle oder pfiffe leersch
Und au zu IIRER Clique g'heersch.

Mit Inserat in jeeder Zyttig,
(Muesch luege scho am näggschte Frittig)
Wird d'Schlacht um Jungi ney entflacht,
(Wär äggscht daasmool s'Renne macht?)

Uns Dybli goot's do wie de Maischte,
Mir kenne is das gar nit laischte.
Mir bruuche s'Gäld fyr unsere Sprosse
E Fasnacht z'biete, wo sich darf gsee losse.
Dr Noochwuggs fyr unseri Drummelstunde
Wird vo de Junge sälber gfunde.

Speeter hilft dr Stamm is us dr Glemmi,
Deert herrscht zer Zyt e "Buschischwemmi".
(Exgyysi isch äggscht Buschischwemmi
Au e Unwort – gottverglemmi?)
Uff alli Fäll wird deert e Basis "produziiert",
Ass unseri Gligge witter existiiert.
Soo hämmer vyyli Keschte gspaart,
Und daas uff familiäri Art.

Denn schliesslig waiss me was me hett,
Mit Noochwuggs us em aige Fasnachtsbett.

Nynzähhundertachtesächzig
isch e Joor, mee schlächt als prächtig.
En Ussnaam bildet doo dä Bricht
vom Kipling sinere Mogli-Gschicht.
Dr Disney Walti macht au mit,
bringt s Dschungelbuech als Kinohit.
Um sällmool d Lyt e bitz z erfraie
und ihri Neet und Aengschd z zerstraie
isch vor fimfezwanzig Joor dä Kärli
namens Mogli, uss däm Märli,
e Held fir Alt und Jung gsi.
Mit Wyydeo bisch hit derbi.

Im Januar vo sällem Joor
hetts zimftig gschneyt gha; das isch woor.
Vierezwanzig Santimeeter
haissts im Radio zwai Daag speeter.
Dr Eff-Cee-Bee losst me verludde,
haig deert no sauguet kenne schudde.
Im Joggeli vor sächzigdausig
spiilt Dytschland gääge d Schwyz ganz lausig;
Null-Null hetts am Schluss denn ghaisse,
hitt gääbts e Siig iiber die Aisse.
Grad vis-à-vis im Schwimmbaad ääne
goot s nejy Sportbaad uff – mit Fääne
und s Schtimmvolgg gid griens Liecht zem baue
vom Stadttheater – s Ney – das Graue.
Das alles hett men uns verkauft,
wo dä Film im Kino lauft.

Mir glaube dass fascht alli Kinder
die Gschicht jo kenne, vo däm Inder.
Als glaine Knirps hett ihn dert unde
e Panther imme Kerbli gfunde.
E Rudel Welf hänn denn das Biebli
ufferzooge – nid mit Riebli –
uff aimool isch das nimm guet gange,
dr Tiger Schir Khan wott en fange.
Drumm wänn die Welf dr Mogli zwinge
und ihn de Mensche retour bringe.
Doch dooderzue kunnts jetze noonig,
dr Uurwald gfallt em guet als Woonig.
Aer wott dr Schterggschri sy vo alle,
nur d Schlange duet em nid dä Gfalle,
schnappt dä Wicht und wott en frässe;
Dr Panther isch dernääbe gsässe
und rettet en zem zwaite Mool,
drumm ischs däm Kärli nimm so wool.

Im Hornig sin bi uns Lawyne
in Uri bis in d Hyser yne
und z Franggrych, ganz genau z Grenoble
duet dr Killy aabehoble
und gwinnt elai – quelle senstanion –
drey Mool Gold fir d Grande Nation.
Im Mai sinn langsam die Lingge verwacht,
hänn d Stroosse z Paris unsicher gmacht.
Speeter im Summer dr groossi Schogg,
Dr Yymarsch in Prag vom ganze Oschtblogg.
Yberall jetz Demonschtranzione,
Kai Mensch glaubt me an Inschtituzione,
wie Olympia in Mexico
wo "Die Jugend der Welt" sött zämmestoo.
Ainzig dä acht-nynzig Satz
vom Beamon, kenn hit jede Spatz.
Zem Schluss vom Joor, scho im Dezämber,
hänn d Lyt denn no in alle Länder
drey Helde gfyrt, es isch nid glooge,
die sinn umme Mond und retour gflooge.

Em Mogli gfalle d Elefante,
är glaubt es syge die Verwandte,
do drifft er ändlig dr Balu,
e groosse Bär – si sinn per Duu.
Si spiile gmietlig mitenander
doo gits e haillos Durenander.
Zwai Affe schnappe pletzlig zue
und umme isch es mit dr Rueh.
Si bringe ihn, was hesch was gisch,
zem Loui, wo dr Keenig isch.
Dä wott fir sich und syni Kinder
e nagelneje Fyraazinder.
Doch das goot nid, er wissets jo,
dr Bär Balu isch wider koo
und mit em schwarze Panther zämme
dien die drey in Dschungel renne.
E bitz speeter hänn vier Gaier
– si briete grad uff ihren Aier –
em Mogli au no hälfe welle,
do kunnt dr Tiger, wott en schelle!
E Blitz, wo grad in Baum yyschloot
rettet dä Glai uss syner Noot.
Aer nimmt e Bängel und zieht uff,
dr Schir Khan faucht, isch zimmlig muff.
Me gseht en grad no fimf Sekunde,
denn isch dä Tiger scho verschwunde.
Dr Mogli hetts denn sälber gmerggt
und sy Vertraue hett sich gschteggt,
Dass är als Mensch jetz lääbe kennt,
isch uss em Dschungel haimzue grennt.