2022: Ändlig


2020: Dis ney' Imperium

2019: Die letscht Schlacht vo Batavia


2017: Es grabblet im Ässe

Mitem Ässen isches hitte soone Sach

Jeede waiss es besser, jeeden isch vom Fach.

«Iss Gmies, iss Fisch, iss Flaisch, dasch gsund.»

Los joo d‘Finger vo Siessem, suntsch wirdsch rund.»

Mir junge Dybli wänn nimme Kalorie zelle,

doorum dien mir unseri Ernäährig umstelle.

Mir halte nyt vo Veganem und sinn au nit glutefrey.

Mir gennen uns ai Stiggli Kuechen ooder sogaar drey.

Das macht uns gaar nyt, das deerf scho syy,

will unser Menu bietet alles fir Gross und Chlyy.

Z‘Basel gits jetz Bio-Flaisch – nit us dr Regioon.

Es isch kai Schwiinigs oder Kalbsmedallioon

Vo grosse Dier, do hänn mir gnue,

es bruucht kaini Seyli mee und au kai Kue.

D‘Dierschitzer sinn zfriide und gänn bald Rue,

ab jetz gits nur no s Glainschte zem Salaat drzue.

E Thai machts voor am Glaarablatz,

Inseggte isst deert nit nur dr Spatz.

In Asie isch so ebbis Gang und Gääbe.

Deert gits scho lang Graabelzygs fir d‘Määge.

Soone Määlwuurm het Proteiin und macht di fit.

E Curry-Wurscht schafft so eppis nit.

E Haigumper am Spiess weggt d‘Lääbensgaischter.

Was mainsch worum wird dr FCB all Joor Maischter?

Im Joggeli wird scho lang kämpft und gschraue,

d‘Graashipfer us Ziiri wäärden in d‘Pfanne ghaue.

In dr Buvette griegsch jetz, das frait uns seehr,

im Summer Glacé mit Grille-Topping als Dessert.

Soone Grille kasch au grilliere uffem Grill,

mit e bitz Knoblauch, Chili und e weeneli Dill.

Sogaar dr Simba, dr Lai, setzt vermeert

Uff Inseggtenaahrig, das het är gleert,

vom Timon und vom Pumbaa, die schwätze kai Saich,

e Inseggt isch zwoor «schleimig aber vitaminreich».

Bald wäärden alli Baizen in Basel noochezieh,

und Inseggten uf d Spyyskarte setze, ooni Mieh.

S‘Schunggebegrääbnis isch passé im Mutz,

deert gits glii Määlwiirm zemen e Kaffi Lutz.

Dr McDonalds bringt im neye Joor

woohrschiins e McWiirmli uuse, ooni Gfoor.

In dr Pizzeria Ristorante Molino

gits Pasta mit Aamaise-Seesli fir s‘Bambino

E Vegetarier im Tibits, wo hässig braablet:

är well gliich kai Flaisch, au wenns nur graablet.

Es kauft au dr Minu am Määrt fir e Frangge,

e bitz Määl, e paar Wiirmli und e weeneli Angge.

Mir Dybli geen jetz im Schitzemattpaargg hinde,

amme go luegen, ob mir in de Bisch e Zvieri finde.

Soonen Amaisehuffe, es wird zer Gwoonet

Länggt uns fasch schoon e ganze Moonet.

Fir d‘Fasnacht sinn mir junge, du hesches gmeerggt.

Uf jeede Fall jetz optimaal gsteerggt.

Mit so vyyl Proteiin und Graft in de Bai,

do zieht sich d‘Ladäärne jo fascht schon ellai.

Bi däm neyen Ernäährigstrend sinn mir voll drbyy

und wänn e guets Byschpiil fir alli junge Gardene syy.

Dr Hunger uf dr Wält, dä kasch beände,

wenn de uffem Grill statt Steaks duesch Grille wände.

Kai Hungersnoot me, es wäär ändligg Rue,

will Inseggte hets drumm fir alli gnue.

Wenn mir yysteen an dr Fasnacht, gseesch es yy:

Hey, die junge deert sinn voller Energyy.

Denn deerfsch ains uff gaar kai Fall vergässe:

bi de Dybli graablets syt neuschtem im Ässe. 

2016: Pokémon GO Olympia

Hänn Sii scho gheert? Uf unsrer Äärde

soll s Pokémon-Fangen olympisch wäärde.

Mir junge Dybli hänn haart trainiert

und uns fir die näggscht Olympiaade qualifiziert.

Als Team "Schwarz-Wyss" setze mir alli schachmatt,

und strääbe noo Gold fir Basel-Stadt.

Die gsamt Jung Garde wird aanekaart,

und goot mit Pokébäll an Staart:

Uff em Spitz vom Minschter lytet scho glyy

e Pikachu mit eme Blitzschlaag die Spiili yy.

Die olympisch Faggle – die goot uns nit uss,

dangg unsrem Ponita, mit Fyyr kunnt äs druss.

Mir fange bim Schwimmen in unserem Rhyy

under dr Johanniter e Schiggy yy.

Bi dr Martinskiirche wäärend em Gloggegebimmel

hoole mir mit eme Speer e Dodu vom Himmel.

Bim Wasserball im Tinguely-Brunne,

hämmer s Karpador gfange, mit däm hooch gwunne.

Als näggschts wiird gruederet uff dr Gryffe-Fääri

es wuurd uns nit wundere, wenn deert e Seemon wääri.

Bim Boogeschiesse bruucht s Beege, me meerggt das schnäll,

doch mir schiesse statt Pfyyl numme Pokébäll.

Im Schitzemattpaargg, dief im Booden unde

hämmer doch glatt e wild Bisasam gfunde,

das weert sich zwoor mit Gift und Galle

emänd isch es doch im Kampf mit uns gfalle.

Bim sprinten an dr Schiffländi – in all däm Buff

fallt uns am Hotel Drey Keenig ebbis bsunders uff:

e Knuddeluff, Pummeluff, und e Fluffeluff

steen statt de Keenig uf em Podäschtli druff.

Die wäärde grad yypaggt, es isch nit zem lache,

um Blatz für die scheenschte drey Waggis z mache.

Bim Kuugelestoosse, z Rieche, dasch nit schlächt,

setze mer logger e Stahlos usser Gfächt.

Am Birskepfli haut e Turtok ins Surfbrätt e Dälle,

will s nit uusegfischt wäärde will, uss de Wälle.

Am Roothuus pfuust – es isch kuum z verdraage –

e digg Relaxo an dr Huusfassaade.

Dinne macht – in däm alte Gmyyr –

e Glumanda dr Regierig unter em Fiidle Fyyr.

Das fange mer nit, vor däm zien mir dr Huet,

will: e weeneli Fyyr duet dr Regierig ganz guet.

Zem Schluss – das deerf me nit vergässe,

dien mir uns im Joggeli mit de Beschte mässe.

Ganz Basel luegt zue, fyyrt uns aa, alles stoot,

die gäägnerische Pokémon – die hänn kai Broot.

E mächtig Mewtu hämmer ghoolt, als Gschänggli

us em Streller sym alte Garderoobe-Schränggli.

S Mewtu gwinnt geeg alles, glatt oder behoort,

in numme weenige Sekunde, dasch Wältrekoord.

Mir sinn die Beschten in dr Arena, ab jetz isch glaar,

die junge Dybli sinn Champions, dasch Wunderbaar.

Uf em Syygerpodäschtli do steen mir yy,

und pfyffe stolz "z Basel a mym Rhyy".

E Pummeluff singgt uns langsam in Schloof

mir liigen aane und zelle d Schoof,

wo mir verwache, iiberleege mir häär und hii,

isch es ächtsch nummen e glai Draimli gsii?

Das macht uns nyt, mir kennes verschmäärze,

die junge Dybli sinn Ginner vo de Häärze.

Mir wisse jetz, mir sinn die Beschten uf Äärde,

sott s Pokémon-Fangen emool olympisch wäärde.


2015:  E Herkules-Uffgoob

Es isch emool gsi vor langer, langer Zyt,

e stolzes Volgg, ryych und gaischtig fit.

Jo, sisch woor, die alte Grieche,

sin e ainig Huffe gsi voller gladde Sieche.

Sie hän könne baue, dängge, dichte, polidisiere,

schryybe, kämpfe, lääse und konkredisiere.

E Hochkultur, wie sy im Bilderbuech stoot,

mit ere Mythologie so riisig asses di halber erschloot.

Dr Poseidon het uff d’Schiffli uffem Meer uffbasst,

die bööse Buebe zem Hades gschasst.

D Aphrodite het gluegt, dass d Liebi floriert,

mit Hilff vo dr Demeter het das au funggtioniert.

Dangg dr Athene isch me gscheit gsi und uff Zagg,

mit em Ares het me sich gweert gege jedes Pagg.

Goot s dr mol schlächt, füülsch di wien e gschlagene Hund

bisch dangg em Apollon schnäll wiidr gsund.

Zoberscht – me dörf en nid vergässe –

isch dr Bappe Zeus uff sim Tröönli gsässe.

Sy Soon, dr Herkules, um göttlig z wäärde, 

het Briefige miesse bewältigge uff dr Äärde.

Fascht unlöösbari Uffgoobe het men em gschtellt,

doch är het se gmaischteret, wiene ächte Held.

Im alte Griecheland, me kaas nid andersch saage,

het me wenig Grund ka zem sich beglaage,

doch denn hän d Römer übernoo,

es isch Grieg und Korruption ins Land yynekoo.

Im Mittelalter het sich s Land miesse de Krüzzüüg stelle,

uffsmool hän au d Osmane e Stiggli Griecheland welle.

Hüt nach vyyle Grieg und Gryyse

hän d Grieche iir Land zrugg, immene Zuestand, e myyse.

Die ryyche Zyte, die sin lang verbyy,

d Akropolis, die roschdet yy.

D Götter hän noodisnoo,

iir Volgg uffgää und dr Olymp verloo.

D Usgoobe styyge, Yynahme singge,

im Staate Griecheland duet s gewaltig stingge.

Doozmool d Erfinder vo dr Demokratie,

verliere sy als wie mee an Sympathie.

Em Zeus fäält dr Stutz in dr Modärne,

es längt kuum no fyr e Gleesli Wyy in dr Taväärne.

Wär isch schuld froggt me sich jetzt,

wär het s Land ins Eländ gschletzt?

Isches d Regierig, d EU oder d Bangge?

Ganz Europa kunnt derwääge ins wangge.

Me will wüsse, es isch zem gruuse,

Wie bekunsch die Grieche us de Schulde uuse?

Europa het e Gäldpäggli aabe gschiggt,

so wäärde d Schulde schnäller gfliggt.

es isch z wenig, am Banggomaat kunnt nüt mee uuse,

es längt nüm zem ässe und zem nöime pfuuse,

Jetz isch au glaar, noo de letschde Waale,

s isch abgstimmt worde: Athen will s Päggli nid zaale.

Mee Gäld wän sy aaber drotzdäm haa,

so funggtioniert Wirtschaft allem Aaschyyn aa.

Me wüntscht sich dr Herkules im grosse Root,

wo s Land uffruumt, wo waiss wies goot.

Dä könnt das Problem lööse, ooni Not,

und Griecheland wäri nimm döört, wo s jetz stoot.

Aaber mit em Herkules isches laider soone Sach,

är isch nur e Gschicht, sy Spirit nimm wach.

Jetz schtöön d Grieche doo, kai Gäld, kai Tschopp,

und mr froogen ys so ganz salopp,

wo sin sy aane, die alte Grieche,

das stolze Volgg voller gladde Sieche?

2013:  Hochzog und deMignioin

E Baustèll dèèrt und aini doo,

willkùmme z Baasel – iirgedwoo.

Kasch di draaie. wände, kèère,

und di ab em Baugrach stèère.

S isch wie im Film, was me so ghèèrt:

E Minion doo – e Minion dèèrt.

Me gseet si iiberaal am schaffe,

d Lyt dien iiber d Schrangge gaffe

und am Rand wird diskutiert,

woo dä Bauboom aanefiert.

Näbscht vyyle glaine Bauvòòrhaabe

dien die au greessri Grääbe graabe.

Luegsch vom Minschter an Horizont,

gseesch graad e soone Graane-Front.

Dr Greessewaan kasch dytlig gsee:

braiter, heecher, mee und mee.

Lut "Times", wo duet Musee teschte,

ghèèrt s Kùnschtmuseeum zue de Bèschte.

Doch ainewääg bruuchts offebaar

mee Blatz – das syg doo alle glaar.

Drùm baut meen aa – und au bitz ùm,

fir alli Bsuecher ganz scheen dùmm:

S wird gschlosse fir e ganzes Jòòr,

nit unumstritte – aaber wòòr.

Im Glaibaasel waggst dangg HaDeeM

e riise Dùùrm – dodaal blemblem.

S hèggschti Huus ùf Schwyzer Äärde

sòll dä ?Stairway to Heaven? wäärde.

Dr Ziircher Dùùrm: e Drägg dergeege,

duet nùmme no Blatz zwai beleege.

(D Ziircher wuurde gar no wèlle,

ass das firs Schutten au däät zèlle.)

Me gseets au bi dr Èèrlematte:

Vyl Hyyser wäärfe doo e Schatte.

Vò ?Matte? also nimm vyyl zgsee,

D Hauptsach: allewyyl no mee.

Drùm faart dèèrt aane glyy e Drämli

ùff das waarte d Baasler nämmli,

das isch em Wessels syyni Mainig,

me isch sich zwòòr nit ganz so ainig.

Und denn no dèèrt z Glaihyynige hinde,

duet me Dytschland an Baasel binde.

Es isch ganz aifach, so wirds gmacht:

Schiine leege firs Drämli acht.

Die Dytsche kènne so vyyl spaare

und mit em Drämli uf Baasel faare.

Dr Karneval mit Stimmigsflogge

duet no mee Schwooben aane lògge

E Baustèll dèèrt und aini doo,

willkùmme z Baasel – iirgedwoo.

Derzue kèmme Zuekumftsvisioone,

Gebeyde mit Speziaal-Funggzioone.

Byspiilswyys saits Vòlgg glaar joo:

Dää Glaaradùùrm, dä soll entstoo.

Und an dr Haiwoog en Ozeanium,

fir d Fischli sicher nit so dùmm.

Derhinder stèggt e Ziircher Blaanig,

dr Hai het dòòrum schò bitz Paanig,

ainewääg duet sich das loone,

sùnscht miesst är no in Ziiri woone.

Wäg em Grach hesch schò kai Rue,

aaber s kunnt no mee derzue:

Mit em Auti stoosch im Stau,

dehaime waartet dyyni Frau.

Nòch em Waarte dènn no sueche,

es goot jètz nimmi ooni z flueche,

dènn au bi glainschte Bauprojäggt,

finde d Minions, s wär perfäggt,

mit em aigne, privaate Kaare

bis vòòr d Baustèll aane z faare.

Und wääge dääne Baustèllschrangge,

kasch em Gòtt perseenlig dangge,

wennd e Phaargblatz findsch dèèrt ùsse:

S isch wie s Roulette vò de Rùsse.

Em Vòlgg foots dòòrùm aafoo stingge,

me duet dä Central Phaarg abwingge.

Als wie mee will me sich rètte,

vòr wytere Grään und Toitoi Toilette.

So vyyl zer Baustèll – das muess länge

sunscht duen y no dä Zeedel spränge.

Mir roote drùm, statt z konstruiere

die drei scheenschte Dääg z gutiere:

Sich fraie, sò fèschts au nùmme goot,

vergässe wies um Baasel stoot,

aggdyv pfyffen, emänd au drùmmle,

bassiv gässlen und ummebùmmle.

Die Deen bhaltsch baardu in den Òòre

wenn d Minions wiider aafèèn bòòre.

E Jòòr lang bisch so zringsùm bhietet

au wènn dr Baumaa wyter wietet.


Impressum

Basler Dybli Jungi Garde

Stiftsgasse 9

4051 Basel

Social Media